खेड: लाखो भाविकांचे (Pune News) श्रद्धास्थान असलेल्या खेड तालुक्यातील खरपुडी खंडोबा मंदिरात काल मध्यरात्री चोरट्यांनी चोरी केली आहे. अज्ञात चोरट्यांनी मंदिराचे कुलूप तोडले आणि थेट गाभाऱ्यात घुसून देव-देवतांचा मौल्यवान ऐवज चोरला. चोरट्यांनी गुरुवारी (4 डिसेंबर) रात्री मंदिर परिसरात कोणी नसल्याचा फायदा घेऊन डाव साधला. सकाळी पहाटे 5 वाजता पुजारी नेहमीप्रमाणे देवपूजा करण्यासाठी आले असता, त्यांना कुलूप तुटलेले दिसून आले चोरीचा प्रकार उघडकीस आला. या चोरीत सुमारे 40 लाख रुपयांच्या वस्तू चोरीला गेल्या, ज्यात प्रामुख्याने 21 किलो वजनाची चांदी आणि दानपेटीतील अंदाजे 60 ते 70 हजार रुपये रोख रक्कम होती.
चोरी झालेल्या वस्तूंत मूर्तीवरील चांदीचे दागिने, स्वयंभू पिंडीचा चांदीचा कवच, देवाची चांदीची पगडी, सहा मोठे चांदीचे हार, मूर्ती, मुकुट आणि सिंहासनावरील वाघाची मूर्ती यांचा समावेश आहे.
परिसरात लावण्यात आलेले सीसीटीव्ही कॅमेरे पूर्णपणे बंद अवस्थेत होते, ज्यामुळे चोरांना पकडणे कठीण आहे. चोरीच्या घटनेनंतर मंदिराच्या ट्रस्टने तातडीने सुरक्षा व्यवस्था आणि सीसीटीव्ही यंत्रणा कार्यान्वित करण्याची मागणी केली असून पोलीस निरीक्षक सुभाष चव्हाण यांच्या मार्गदर्शनाखाली या चोरीचा सखोल तपास सुरू आहे.
