पुणे: पुणे (Pune News) विमानतळ परिसरात एप्रिल 2025 पासून वारंवार दिसणाऱ्या बिबट्याला पकडण्याच्या दीर्घ प्रयत्नांना यश आले आहे. विमानतळाचा परिसर अत्यंत संवेदनशील असल्याने बिबट्याला पकडणे मोठे आव्हान होते. बिबट्या भूमिगत बोगदे, दाट झाडी आणि कमी वर्दळ असलेल्या भागात तो लपत होता. त्याला पकडण्यासाठी कॅमेरा ट्रॅप, लाईव्ह कॅमेरे आणि पिंजरे वापरून सातत्याने निरीक्षण ठेवले जात होते. परंतु बिबट्या मोठ्या हुशारीने लपत होता. दरम्यान, गुंतागुंतीच्या मोहिमेत बिबट्याला सुरक्षितपणे पकडण्यात अखेर यश आले आहे.
बिबट्याला अंदाजे 80 फूट लांबीच्या बोगद्यात आणले गेले, जेथे त्याला नियंत्रित परिस्थितीत बेशुद्ध करून पकडले. ही यशस्वी मोहीम पुणे वन विभाग, रिस्क्यू चॅरिटेबल ट्रस्ट, भारतीय हवाई दल आणि पुणे विमानतळ प्राधिकरण यांनी संयुक्तपणे राबवली आहे. बिबट्याला पकडून त्याला वैद्यकीय तपासणीसाठी हलवण्यात आले. सध्या तो बावधन, पुणे येथील ट्रान्झिट ट्रीटमेंट सेंटरमध्ये आहे.
