पुणे: पुण्यातील शिवाजीनगर न्यायालयाने (Pune News) पहिल्यांदाच सामुदायिक सेवा म्हणजेच कम्युनिटी सर्व्हिस स्वरूपाची शिक्षा सुनावत महत्त्वाचा आणि दखलपात्र निर्णय दिला आहे. सार्वजनिक ठिकाणी मद्यपान करून गैरवर्तन करणाऱ्या आरोपींना थेट तुरुंगात न पाठवता समाजोपयोगी कामाची शिक्षा देण्यात आली आहे. (Pune Crime)
या प्रकरणात अटक करण्यात आलेल्या दोन आरोपींना न्यायालयाने 4 दिवस दररोज 3 तास पोलिसांच्या देखरेखीखाली सामुदायिक सेवा करण्याची शिक्षा सुनावली आहे. यामुळे समाजात शिस्त आणि सार्वजनिक ठिकाणी वर्तनाबाबत जागरूकता निर्माण होईल, असा न्यायालयाचा हेतू असल्याचे मानले जात आहे.
या प्रकरणाची माहिती अशी की, 3 डिसेंबर रोजी रात्री साडे 9 च्या सुमारास पोलीस कर्मचारी गस्त घालत असताना पुणे महापालिकेच्या इमारतीजवळ दोन तरुण सार्वजनिक ठिकाणी मद्यपान करत गैरवर्तन करताना आढळून आले पोलिसांनी दोघांना ताब्यात घेऊन शिवाजीनगर पोलीस ठाण्यात त्यांच्याविरोधात अदखलपात्र गुन्हा दाखल केला.
हे प्रकरण न्यायालयात आल्यानंतर दोन्ही आरोपींनी आपला गुन्हा कबूल केला. त्यानंतर शिवाजीनगर न्यायालयाचे अतिरिक्त मुख्य न्यायदंडाधिकारी विक्रमसिंह भंडारी यांनी आरोपींना तुरुंगवास न देता सामुदायिक सेवेची शिक्षा सुनावली. ही शिक्षा महाराष्ट्र शासनाच्या असाधारण राजपत्र भाग 4-क दिनांक 28 नोव्हेंबर 2024 नुसार देण्यात आल्याची माहिती पोलिसांकडून देण्यात आली आहे.
ही संपूर्ण कारवाई शिवाजीनगर पोलीस ठाण्याचे वरिष्ठ निरीक्षक महेश बोलकोटगी आणि त्यांच्या पथकाने केली. या निर्णयामुळे किरकोळ गुन्ह्यांमध्ये सुधारात्मक शिक्षेला प्राधान्य देण्याचा नवा पायंडा पडल्याचे बोलले जात आहे.
