Pune News: लोणी काळभोर, ता. 1 : घरगुती सिलेंडरमधून गॅस गळती (Gas Leak) होऊन अचानक स्फोट झाल्याची घटना घडली आहे. या स्फोटात महिला भाजून गंभीर जखमी झाली आहे. तर स्फोटमुळे घरातील खिडकी तुटून खाली रस्त्यावर पडल्याने दुचाकीवरून चाललेला एक जण गंभीर जखमी झाला आहे. ही घटना लोणी काळभोर (ता. हवेली) ग्रामपंचायत हद्दीतील नेहरू चौकाजवळ असलेल्या जगताप हाईट्स इमारतीत सोमवारी (ता.1) सकाळी साडेदहा वाजण्याच्या सुमारास घडली आहे. Pune News
हेही वाचा- सावधान! ॲल्युमिनियमच्या भांड्यात स्वयंपाक बनवणे म्हणजे विष खाणे; आरोग्यावर होतो गंभीर परिणाम
करूणा मनोज जगताप असे जखमी झालेल्या महिलेचे नाव आहे. तर जखमी झालेल्या तरुणाचे नाव समजले नाही. दोघांनाही लोणी काळभोर येथील एका बड्या रुग्णालयात उपचारासाठी दाखल करण्यात आले आहे. मिळालेल्या माहितीनुसार, करूणा जगताप या घरात एकट्या होत्या. त्यांच्या घरात गॅसच्या दोन टाक्या व गॅस गिझर आहे. परंतु, सोमवारी सकाळी गॅस गळती होऊन मोठा स्फोट झाला. दरम्यान दिवाळीला आणलेले फटाके हे घरात शिल्लक राहिले होते. ते ही यावेळी जोरात वाजले. या स्फोटात करूणा जगताप या होरपळल्या. हा स्फोट इतका भयंकर होता की, घराचे दरवाजे, खिडक्या तुटून पडल्या. तर घरातील वस्तू जळून खाक झाल्या. दरम्यान, नेहरू चौकाजवळील रस्त्यावरून तिघेजण दुचाकीवरून जात होते. त्याचवेळी हा स्फोट होऊन खिडकी खाली पडून एका तरुणाच्या हाताला गंभीर मार लागला आहे.
या घटनेची माहिती मिळताच, लोणी काळभोर पोलीस ठाण्याचे पोलीस निरीक्षक (गुन्हे) स्मिता पाटील, सहाय्यक पोलीस निरीक्षक अंकुश बोराटे, पोलीस उपनिरीक्षक पूजा माळी, सहाय्यक फौजदार रामदास मेमाणे, पोलीस हवालदार मंगेश नानापुरे, मल्हारी ढमढेरे तसेच लोणी काळभोरचे सरपंच नागेश काळभोर हे तत्काळ घटनास्थळी दाखल झाले. पोलिसांनी स्थानिक नागरिकांच्या मदतीने आग विझवली. व दोन्ही जखमींना तत्काळ महाराजा रुग्णवाहिकेतून लोणी काळभोर येथील एका बड्या रुग्णालयात उपचारासाठी दाखल करण्यात आले आहे. करूणा जगताप यांची प्रकृती गंभीर असून तरुणाचा हात फ्रॅक्चर झाल्याची प्राथमिक माहिती मिळत आहे.
पहा व्हिडिओ
View this post on Instagram
दरम्यान, सिलेंडरमधून गॅस गळती, गिझर स्फोट, फटाके वाजल्यामुळे का अन्य कोणत्या कारणाने हा स्फोट झाला आहे. याचे खरे कारण अद्याप समोर आलेले नाही. परंतु, घटनास्थळाची तपासणी करण्यासाठी फोरेन्सिक टीम दाखल झाली आहे. त्यांच्या तपासातून स्फोटाचे नक्की कारण समजेल. पुढील तपास लोणी काळभोर पोलीस करत आहेत.
हेही वाचा- शिंदेंना धक्का..! शहाजी बापू यांच्या कार्यालयावर निवडणूक अधिकाऱ्यांची अचानक धाड; राजकारणात खळबळ
