पुणे: पुणे-मुंबई द्रुतगती मार्गावर (Pune News) पुनावळे भागात एका अत्यंत क्रूर घटनेमुळे खळबळ उडाली आहे. एका किरकोळ रस्ते अपघातावरून वाद झाल्यानंतर, तीन तरुणांनी तरुणीच्या गाडीचा पाठलाग करून तिच्यावर दगडफेक केली. या हिंसक हल्ल्यात कारच्या काचा फुटल्या आणि काचेचा एक तुकडा तरुणीच्या डोळ्यात गेल्याने तिच्यावर त्वरित शस्त्रक्रिया करण्याची वेळ आली.
ओव्हरटेक करण्याच्या प्रयत्नात, कात्रज-देहू रोड बायपासवरील अंडरपासजवळ गुप्ता यांच्या कारचा टायर दुचाकीवर असलेल्या तीन व्यक्तींपैकी एकाच्या पायाला लागल्याचे सांगितले जाते. यावरून दुचाकीस्वारांनी लगेचच कार थांबवून तिघांनी दगडफेक करण्यास सुरुवात केली आहे. घाबरलेल्या जोडप्याने पुढे पळून जाण्याचा प्रयत्न केला, पण ट्रॅफिकमध्ये त्यांची कार अडकली.
हल्लेखोरांनी पाठलाग केला आणि गाडीच्या इतर काचा फोडल्या. फुटलेल्या काचेचा एक धारदार तुकडा पूजा गुप्ता यांच्या डाव्या डोळ्यात घुसल्याने त्यांना मोठ्या प्रमाणात रक्तस्राव झाल्यानंतर चिंचवड येथील एका खासगी रुग्णालयात दृष्टी वाचवण्यासाठी तातडीने कॉर्निओस्क्लेरल रिपेअर ही गुंतागुंतीची शस्त्रक्रिया करण्यात आली.
शस्त्रक्रिया झाली असली तरी आठवडाभरात त्यांच्या डोळ्याची दृष्टी पूर्णपणे परत आलेली नाही. रावेत पोलिस ठाण्यात तक्रार दाखल केल्यानंतर पोलिसांनी आरोपींना पकडले परंतु संबंधित कलमांखाली फक्त नोटीस देऊन त्यांना सोडून देण्यात आले.
