Pune Double Decker Bus: पुणे : पुणे महानगर परिवहन महामंडळाकडून शहराच्या सार्वजनिक वाहतुकीत मोठा बदल घडवण्याचा निर्णय घेण्यात आला आहे. पीएमपीकडून 25 इलेक्ट्रिक डबल डेकर बस खरेदी करण्याचा अंतिम निर्णय झाला असून, त्यासाठी निविदा प्रक्रिया पूर्ण करण्यात आली आहे. नवीन वर्षात पुणे आणि पिंपरी-चिंचवड शहरातील काही प्रमुख मार्गांवर या बस धावताना दिसणार आहेत. या निर्णयामुळे शहरातील प्रवाशांना दिलासा मिळणार आहे.
हेही वाचा – साडे येथील विशाल ढवळे याची कुमार महाराष्ट्र केसरी स्पर्धेसाठी निवड
वाहतूक कोंडीचा त्रास होणार कमी
पीएमपीच्या संचालक मंडळाने यापूर्वीच या बस खरेदीस मान्यता दिली होती. त्यानंतर सप्टेंबर महिन्यात हिंजवडी, भोसरी, कोरेगाव पार्क, विमाननगर अशा विविध भागांतील रस्त्यांवर डबल डेकर बसची 10 दिवसांची चाचणी घेण्यात आली होती. ही चाचणी यशस्वी ठरल्यानंतर पीएमपी प्रशासनाने पुढील पाऊल उचलले. या बसमधून एका वेळी अधिक प्रवाशांची वाहतूक शक्य होणार आहे, त्यामुळे गर्दीच्या वेळेत होणारा ताण कमी होण्याची शक्यता आहे.
या सर्व बस इलेक्ट्रिक असल्यामुळे पर्यावरणपूरक ठरणार आहेत. प्रदूषण कमी करणे आणि इंधन खर्च वाचवणे हा यामागचा मुख्य उद्देश आहे. बसच्या बॅटरीची क्षमता, चार्जिंग वेळ आणि एकूण कार्यक्षमता यांचा अभ्यास करण्यासाठी तीन सदस्यांची विशेष समिती नेमण्यात आली होती. या समितीचा अहवाल सकारात्मक आल्यानेच 25 ई-डबल डेकर बस खरेदीचा निर्णय घेण्यात आला.
मुंबईत डबल डेकर बसला प्रवाशांचा चांगला प्रतिसाद मिळत आहे. त्याच धर्तीवर पुणे आणि पिंपरी-चिंचवडमधील प्रवाशांनाही ही सुविधा उपलब्ध करून देण्याचा पीएमपीचा प्रयत्न आहे. या बस पूर्णपणे वातानुकूलित असतील आणि प्रवास अधिक सोयीस्कर करतील.
