Palghar Shocking: पालघर: पालघर जिल्ह्यातून एक धक्कादायक घटना उघडकीस आली आहे. या ठिकाणी वर्दीतील रक्षकच भक्षक बनल्याची संतापजनक घटना घडली आहे. पालघर येथील पोलीस ठाण्यात चौकशीसाठी आलेल्या एका महिलेवर पोलीस हवालदारांनी लैंगिक अत्याचार केल्याचा गंभीर आरोप करण्यात आला आहे. या घटनेनंतर परिसरात एकच खळबळ उडाली आहे.
हेही वाचा- महापालिका निवडणुक मैत्रीपूर्ण लढण्याची शक्यता, राज्यमंत्री मुरलीधर मोहोळ यांची स्पष्टता
मिळालेल्या माहितीनुसार, तक्रारदार महिलेने सांगितले की, ती कासा पोलीस ठाण्यात चौकशीसाठी आली होती, मात्र या प्रक्रियेदरम्यान हवालदार शगर बोगाडे यांनी चौकशीच्या नावाखाली अश्लिल कृत्य केले. या प्रकरणी डहाणू पोलीस ठाण्यात झिरो क्रमांकाने FIR दाखल केला.
या प्रकरणाचा पुढील तपास आता कासा पोलीस ठाण्याकडे हस्तांतरित करण्यात आला असून, हवालदार बोगाडे याच्यावर लैंगिक अत्याचारासह विविध कलमांअंतर्गत गुन्हा नोंदविण्यात आला आहे. आरोपी हवालदाराला लोकल क्राइम ब्रांचच्या पथकाने ताब्यात घेतले आहे.
पोलीस निरीक्षकाची बदली
घटनेची गंभीर दखल घेत जिल्हा पोलीस अधीक्षक यतिश देशमुख यांनी तातडीने कारवाई केली आहे. कासा पोलीस ठाण्याचे पोलीस निरीक्षक अविनाश मंडले यांची तात्काळ बदली करून त्यांना जिल्हा मुख्यालयात हलविण्यात आले आहे. त्यांच्या जागी पोलीस निरीक्षक अमर पाटील यांची नियुक्ती करण्यात आली आहे.
या घटनेनंतर पुन्हा एकदा महिला सुरक्षेचा प्रश्न ऐरणीवर आला आहे. पालघरची ही घटना सर्वांना हादरवून टाकणारी आहे. या प्रकरणी पोलीस पुढील कारावाई करत आहे.
