पुणे: पिंपरीमध्ये दोन दिवसांपूर्वी नितीन गिलबिले (Nitin Gilbile Murder) यांची वडमुखवाडी-अलंकापुरम (Pune Crime) रस्त्यावर फॉर्च्युनर गाडीत गोळ्या झाडून हत्या करण्यात आली होती. कारमध्ये तिघांमध्ये झालेली चर्चा वादात बदलली आणि या वादात अमित पठारे व विक्रांत ठाकूर यांनी पिस्तुलातून नितीन गिलबिले यांच्यावर गोळ्या झाडल्या. त्यानंतर त्यांचा मृतदेह गाडीतून बाहेर फेकून देत त्यांच्या पायावरून गाडी चालवत दोघेही घटनास्थळावरून फरार झाले. या हत्या प्रकरणात आता धक्कादायक माहिती समोर आली असून एकूण चार जणांचा या हत्येच्या कटात सहभाग असल्याचं पोलीस तपासातून उघड झालं आहे. आरोपींची नावे अमित पठारे, विक्रांत ठाकूर, सुमित पटेल आणि आकाश पठारे अशी असून यातील अमित पठारे आणि विक्रांत ठाकूर याला न्यायालयाने 21 नोव्हेंबरपर्यंत पोलीस कोठडी सुनावली आहे. इतर दोन्ही आरोपींना आज न्यायालयात हजर करण्यात येणार आहे. (Latest Breaking News)
पिंपरी चिंचवडचे पोलीस उपायुक्त मारुती जगताप यांनी पत्रकार परिषद घेऊन या प्रकरणाची माहिती दिली. “या हत्या प्रकरणात सुरुवातीला दोन आरोपींचा सहभाग आढळला होता. मात्र तपास वाढवल्यानंतर आणखी दोन जणांचा सहभाग उघड झाला असून एकूण चार जणांनी मिळून ही हत्या केली आहे. या चार जणांपैकी दोन आरोपी प्रत्यक्ष घटनास्थळी उपस्थित होते, तर उर्वरित दोन आरोपींचा सहभाग नंतर स्पष्ट झाला. नितीन गिलबिले यांच्या हत्येसाठी वापरण्यात आलेलं शस्त्र अद्याप पोलिसांच्या हाती लागलेलं नाही. आरोपींची सखोल चौकशी करून शस्त्र शोधण्याचे प्रयत्न सुरू आहेत,” अशी माहिती उपायुक्त जगताप यांनी दिली.
नितीन गिलबिले यांची हत्या दोघा मित्रांनी केल्याचं समोर आल्यानंतर या प्रकरणामागचं नेमकं कारण काय असावं, याबाबत चर्चा सुरू होती. यावर उपायुक्त जगताप म्हणाले, “प्राथमिकदृष्ट्या हा खून आर्थिक व्यवहारातील वादातून झाल्याचं दिसत आहे. मात्र हा वाद नेमका कशातून निर्माण झाला आणि तो किती दिवसांपासून सुरू होता, हे तपासाअंती स्पष्ट होईल. आरोपींची चौकशी सुरू असून या हत्येचा कट कधीपासून रचला गेला होता, याचा तपास सुरू आहे.”
दरम्यान, पोलिसांनी दिलेल्या माहितीनुसार अटक केलेले दोन आरोपी रेकॉर्डवरील गुन्हेगार आहेत. त्यांच्यावर याआधीही अनेक गुन्हे दाखल आहेत. ज्या फॉर्च्युनर कारमध्ये नितीन गिलबिले यांची हत्या करण्यात आली ती कार आरोपी अमित पठारे याच्या मालकीची होती. पिंपरी-चिंचवड पोलिसांनी विक्रांत ठाकूरला लोणावळा परिसरातून आणि अमित पठारेला वाघोली परिसरातून अटक केली. हे हत्या प्रकरण केवळ प्लॉटिंग आणि संपत्तीच्या वादापुरतं मर्यादित आहे की यात आणखी काही गुंतागुंत आहे, याबाबतची माहिती पुढील तपासानंतर स्पष्ट होणार आहे.
