Nagarparishad Election : कोपरगावमध्ये सुरू असलेल्या नगरपरिषद निवडणुकीदरम्यान एस. जी. महाविद्यालयातील मतदान केंद्रावर काही काळ गोंधळाची परिस्थिती निर्माण झाली. भाजप आणि राष्ट्रवादी काँग्रेसच्या उमेदवारांचे समर्थक आमनेसामने आले आणि त्यांच्यात जोरदार वाद झाला. दोन्ही बाजूंनी एकमेकांवर मतदारांवर दबाव टाकत असल्याचे आरोप करण्यात आले.
हा सगळा प्रकार पोलिसांच्या उपस्थितीतच घडला. परिस्थिती हाताबाहेर जात असल्याचे लक्षात येताच पोलिसांनी त्वरित हस्तक्षेप केला आणि दोन्ही पक्षांच्या कार्यकर्त्यांना मतदान केंद्राच्या परिसरातून दूर केले. या वेळी काही प्रतिनिधी आणि पोलिसांमध्ये शाब्दिक वाद झाल्याचेही पाहायला मिळाले. (Nagarparishad Election)
या घटनेमुळे मतदान केंद्रावर काही वेळ तणावाचं वातावरण होतं. परिसरात मोठी गर्दी जमली होती. कोणताही अनुचित प्रकार घडू नये म्हणून पोलिसांनी बंदोबस्त वाढवला. दुपारनंतर मतदारांची संख्या वाढताना दिसली. मिळालेल्या माहितीनुसार, सकाळी साडे अकरा वाजेपर्यंत सुमारे १८ टक्के मतदान झालं होतं.
कोपरगावमधील ही निवडणूक काळे आणि कोल्हे गटांच्या वर्चस्वासाठी महत्त्वाची मानली जाते. सकाळी थंडीमुळे मतदानाचा वेग कमी होता, मात्र दुपारी गर्दी वाढल्यानंतर पुन्हा वादाला तोंड फुटलं. मतदारांवर प्रभाव टाकल्याचे आरोप दोन्ही बाजूंनी झाले.
दरम्यान, पोलिस प्रशासन पूर्णपणे सतर्क असून मतदान शांततेत पार पडावे यासाठी मतदान केंद्रांच्या आजूबाजूला कडक बंदोबस्त ठेवण्यात आला आहे.
याच दरम्यान, नाशिक जिल्ह्यातील सिन्नर नगरपरिषदेत बोगस मतदानाचा प्रकार समोर आला आहे. प्रभाग क्रमांक 2 मध्ये एका तरुणाने बनावट आधार कार्डच्या मदतीने मतदान करण्याचा प्रयत्न केला. तो आपल्या भावाच्या जागेवर मतदान करण्यासाठी आला होता. निवडणूक अधिकाऱ्यांनी वेळीच त्याला पकडून पोलिसांच्या ताब्यात दिलं.
