मुंबई : मुंबई महापालकेच्या महापौर रितू तावडे या खर्चावरून पुन्हा एकदा वादात सापडल्या आहेत. तावडे यांच्या सोशल मीडिया व्यवस्थापनासाठी बृहन्मुंबई महानगरपालिकेने 25 लाख 12 हजार 786 रुपयांच्या खर्चाचा प्रस्ताव तयार केला आहे. त्यामुळे नव्या वादाला तोंड फुटले आहे.
1 ऑगस्ट 2026 ते 31 जुलै 2027 या एक वर्षाच्या कालावधीसाठी हा निधी वापरला जाणार असून, मुंबई महानगरपालिका कायदा 1888 च्या कलम 69-क नुसार हा प्रस्ताव स्थायी समितीकडे मंजुरीसाठी पाठवण्यात आला आहे.या प्रस्तावामुळे महापालिकेत नवा राजकीय वाद पेटण्याची शक्यता निर्माण झाली आहे.
स्थायी समितीसमोरील कागदपत्रांमध्ये स्पष्टपणे ‘महापौर कार्यालयाचे सोशल मीडिया हँडलिंग’ असा उल्लेख आहे. परंतु, प्रकरण प्रसिद्धीझोतात आल्यावर पालिकेने दिलेले स्पष्टीकरण वेगळेच आहे. हा खर्च केवळ महापौरांच्या वैयक्तिक प्रसिद्धीसाठी नसून संपूर्ण पालिका प्रशासनाच्या सोशल मीडिया व्यवस्थापनातील तांत्रिक कर्मचाऱ्यांसाठी असल्याचा दावा पालिकेने केला आहे. या परस्परविरोधी दाव्यांमुळे संशय व्यक्त केला जात आहे.
याआधीही महापौरांच्या निवासस्थानाच्या नूतनीकरणाच्या खर्चावरून मोठा गदारोळ झाला होता. एप्रिल 2026 मध्ये बंगल्याच्या अंतर्गत दुरुस्तीसाठी 3.40 कोटी रुपये आणि जुलै 2026 मध्ये बाह्य कामांसाठी 2.89 कोटी रुपये असे एकूण 6.29 कोटी रुपये प्रस्तावित करण्यात आले होते. मात्र, जोरदार विरोध झाल्यानंतर बाह्य कामांचा 2.89 कोटींचा प्रस्ताव रद्द करावा लागला होता.
तसेच, माजी महापौर आणि विरोधी पक्षाच्या नेत्या किशोरी पेडणेकर यांनी यापूर्वी तावडे यांच्यावर गंभीर आरोप केले होते. तीन महिन्यांच्या प्रसिद्धीसाठी 10 लाख रुपयांचा खर्च आणि खाजगी स्वीय सहाय्यकासाठी दरमहा 50 हजार रुपयांच्या मानधनाची मागणी केल्याचा दावा त्यांनी केला होता. आता पुन्हा एकदा 25 लाखांहून अधिक रुपयांच्या सोशल मीडिया कंत्राटामुळे महापौरांच्या प्रसिद्धी खर्चाचा मुद्दा चर्चेच्या केंद्रस्थानी आला आहे.
