Loni Kalbhor : पूर्व हवेलीतील कोलवडी, मांजरी खुर्द व आव्हाळवाडी परिसरात मागील काही दिवसांपासून बिबट्यांचा वावर प्रचंड वाढला आहे. त्यामुळे या परिसरात परिसरात तात्काळ पिंजरे लावावेत अशी मागणी आरोग्यदूत व ग्रामपंचायत सदस्य युवराज काकडे यांनी निवेदनाद्वारे जिल्हा वनाधिकारी महादेव मोहिते यांच्याकडे केली. सोमवारी (ता. 08) पुण्यातील वनसंरक्षक कार्यालयात प्रत्यक्ष जाऊन निवेदन देऊन हि मागणी केली आहे. ( Loni Kalbhor)
दिलेल्या निवेदनानुसार, पूर्व हवेली तालुक्यातील कोलवडी भागातील गायकवाड वस्ती, थोरातवस्ती, नामाजी पाटील मळा, तसेच मांजरीतील VTP प्रकल्प परिसर आणि आव्हाळवाडीतील डोमखेलवस्ती परिसरात वारंवार बिबट्यांचे दर्शन झाल्याने नागरिकांमध्ये भितीचे वातावरण निर्माण झाले आहे. या बिबट्यांच्या हल्ल्यांत काही जनावरांचा मृत्यू झाला आहे.
वारंवार बिबट्याचे दर्शन झाल्याने, तिन्ही गावांतील शहरालगत दाट लोकवस्ती असल्याने नागरिकांच्या सुरक्षिततेचा प्रश्न अधिक गंभीर बनला आहे. या परिसराची एकत्रित लोकसंख्या तब्बल एक लाखांच्या घरात असल्याने तातडीने उपाययोजना करणे गरजेचे असल्याचे निवेदनात म्हटले आहे. आपल्या वन विभागाच्या पथकास तात्काळ कोलवडी, मांजरी खुर्द व आव्हाळवाडी परिसराची पाहणी करण्यास सांगून, नागरिकांच्या सुरक्षेच्या अनुषंगाने लवकरात लवकर योग्यत्या उपाययोजना कराव्यात अशी मागणी निवेदनाद्वारे करण्यात आली आहे.
दरम्यान, निवेदनानंतर जिल्हा वनाधिकारी महादेव मोहिते यांनी तालुका वनअधिकाऱ्यांना तातडीने पाहणी करून आवश्यक कार्यवाही करण्याच्या सूचना दिल्याची माहिती काकडे यांनी दिली.
यासंदर्भात आरोग्यदूत व ग्रामपंचायत सदस्य युवराज काकडे म्हणाले, “बिबट्यांच्या वाढत्या वावरामुळे सामान्य नागरिक, शेतकरी आणि जनावरांच्या सुरक्षेसाठी तात्काळ पिंजरे लावावेत, अशी मागणी करण्यात आली. त्यानुसार जिल्हा वनाधिकारी महादेव मोहिते तात्काळ तालुका वन अधिकाऱ्यांना सूचना देऊन यापुढेही सर्वतोपरी सहकार्य करण्याची ग्वाही दिली.”
