कोल्हापूर : पोलिस दलातील एका (Kolhapur News) हवालदाराच्या चहा दुकानातच बनावट नोटा (Kolhapur Crime) छपाईचे मोठे रॅकेट सुरू असल्याचा धक्कादायक प्रकार समोर आला आहे. मिरज शहरातील गांधी चौक पोलिसांनी केलेल्या गुप्त तपासातून तब्बल 1 कोटी रुपयांच्या बनावट नोटांचे रॅकेट उघडकीस आले असून, कोल्हापूर पोलिस दलातील हवालदारासह 5 जणांना अटक करण्यात आली आहे. या कारवाईमुळे पश्चिम महाराष्ट्रात कार्यरत असलेल्या मोठ्या बनावट नोटा टोळीचे जाळे उघड झाले आहे.
मिळालेल्या माहितीनुसार, 8 ऑक्टोबर रोजी मिरज-कोल्हापूर रस्त्यावरील नीलजी बामणी पुलाजवळ एक व्यक्ती बनावट नोटा विक्रीसाठी येणार असल्याची खात्रीशीर माहिती पोलिसांना मिळाली होती. त्यानुसार सहायक निरीक्षक संदीप शिंदे यांच्या पथकाने छापा टाकत सुप्रीत काडापा देसाई याला 42 हजार रुपयांच्या बनावट नोटांसह अटक केली. चौकशीदरम्यान या नोटांची छपाई कोल्हापूर पोलिस दलातील वाहन चालक हवालदार इब्रार इनामदार यांच्या “सिद्धलक्ष्मी अमृततुल्य चहा” या दुकानात होत असल्याचे उघड झाले.
कसबा बावड्यातील या दुकानात झेरॉक्स मशीन, कलर प्रिंटर आणि पेपर कटरच्या साहाय्याने बनावट नोटांची छपाई केली जात होती. पोलिसांनी या ठिकाणी छापा टाकून 500 आणि 200 रुपयांच्या नोटांसह तब्बल 1 कोटी रुपये किंमतीच्या बनावट नोटा, नोटा मोजायचे मशीन, स्कॅनर, प्रिंटर आणि एक चारचाकी वाहन असा एकूण 1 कोटी 11 लाख रुपये किमतीचा मुद्देमाल जप्त केला.
या प्रकरणी पाच आरोपींना अटक करण्यात आली असून, त्यामध्ये मुख्य सूत्रधार इब्रार आदम इनामदार, सुप्रीत काडापा देसाई, राहुल जाधव, नरेंद्र शिंदे आणि मुंबईतील सिद्धेश म्हात्रे यांचा समावेश आहे. न्यायालयाने सर्व आरोपींना 13 ऑक्टोबरपर्यंत पोलिस कोठडी सुनावली आहे. प्राथमिक तपासात हे बनावट नोटांचे वितरण स्थानिक स्वराज्य संस्था निवडणुकीच्या पार्श्वभूमीवर होऊ शकते, अशी शक्यता व्यक्त केली जात आहे. संशयित आरोपी प्रत्येक 500 रुपयांच्या खऱ्या नोटेच्या बदल्यात तीन बनावट नोटा पुरवत असल्याचेही पोलिस तपासातून स्पष्ट झाले आहे.
या प्रकरणाचा अधिक तपास सुरू असून, आणखी काही संशयितांच्या शोधासाठी पोलिस पथके कार्यरत आहेत. पोलिस अधीक्षक संदीप घुगे यांच्या मार्गदर्शनाखाली झालेल्या या कारवाईचे सर्वत्र कौतुक होत असून, गांधी चौक पोलिस पथकाचा विशेष गौरव करण्यात आला आहे. दोषींवर कठोर कारवाई होईल, असे आश्वासन पोलिस अधीक्षकांनी दिले आहे.
