पुणे: फंगल इन्फेक्शन अर्थात बुरशीजन्य संसर्गाचे (Fungal Infection) प्रमाण सध्याच्या आर्द्रतापूर्ण आणि दमट हवामानामुळे मोठ्या प्रमाणात वाढले आहे. ओलावा आणि घामामुळे त्वचेवर फंगसची वाढ होण्यासाठी अनुकूल वातावरण तयार होते. फंगल इन्फेक्शन जरी सामान्य असले तरी, त्यावर वेळेत उपचार न केल्यास ते त्रासदायक ठरू शकते.
फंगल इन्फेक्शन म्हणजे काय?
फंगल इन्फेक्शन हे एका प्रकारच्या बुरशीमुळे होणारे संसर्गजन्य रोग आहेत. याला सामान्य भाषेत ‘नायटा’ किंवा ‘गजकर्ण’ असेही म्हटले जाते. त्वचेवर जास्त काळ ओलावा टिकून राहिल्यास किंवा अस्वच्छता राहिल्यास हा संसर्ग होतो.
खाज, ॲथलीट फूट आणि नखांचे इन्फेक्शन हे फंगल इन्फेक्शनचे सामान्य प्रकार आहेत. त्वचेवर लालसर चट्टे किंवा गोलसर डाग येणे, तीव्र खाज सुटणे, त्वचा फुटणे आणि सूज येणे इत्यादी लक्षणे दिसून येतात. ओलाव्यामुळे फंगस (बुरशी) वाढायला संधी मिळते. यामुळे संसर्गाचा धोका वाढतो.
फंगल इन्फेक्शनपासून बचावाचे उपाय
फंगल इन्फेक्शन सामान्य असले तरी, वैयक्तिक स्वच्छता आणि योग्य काळजी घेतल्यास या संसर्गापासून दूर राहता येते: विशेषतः ज्या भागात खूप घाम येतो तो भाग नेहमी स्वच्छ आणि कोरडा ठेवा. ओले झालेले कपडे किंवा ओल्या चपला/बूट घालणे पूर्णपणे टाळावे. नियमितपणे आंघोळ करून त्वचा स्वच्छ आणि कोरडी ठेवावी. संसर्ग जास्त प्रमाणात वाढल्यास धोका अधिक वाढू शकतो, त्यामुळे वेळीच काळजी घ्या.
