Deputy CM Eknath Shinde News : उपमुख्यमंत्री एकनाथ शिंदे यांनी अजित पवार गटाला मोठा धक्का दिला आहे. पारनेर तालुक्यात झालेल्या शिवसेनेच्या जाहीर मेळाव्यात राष्ट्रवादी काँग्रेस (अजित पवार गट) चे जिल्हा परिषदेचे उपाध्यक्ष सुजित झावरे पाटील यांनी तब्बल 25 सरपंच, अनेक पदाधिकारी आणि शेकडो कार्यकर्त्यांसह शिवसेनेत प्रवेश केला. या वेळी उपमुख्यमंत्री एकनाथ शिंदे उपस्थित होते. त्यांनी झावरे पाटील यांच्या प्रवेशाचे स्वागत करत पारनेरच्या विकासाची जबाबदारी स्वतःकडे घेतली असल्याचे स्पष्ट केले.
शिंदे म्हणाले की, सुजित झावरे पाटील यांच्या प्रवेशामुळे पारनेर आणि नगर जिल्ह्यात शिवसेनेची ताकद अधिक वाढली आहे. त्यांनी समाजकारणातून आणि जनतेच्या विश्वासातून स्वतःचे स्थान निर्माण केले आहे. त्यांच्याकडे धनादेश नसला तरी जनादेश आहे, असे शिंदे यांनी सांगितले. त्यांनी कार्यकर्त्यांना उद्देशून लोकसभा आणि विधानसभा निवडणुका आपण जिंकल्या असल्याचे सांगत, आता स्थानिक स्वराज्य संस्थांमध्ये भगवा फडकवण्याचा संकल्प करूया, असे आवाहन केले.
शिंदे पुढे म्हणाले की, लोकप्रतिनिधी हा जनतेचा सेवक असावा, स्थगिती देणारा नसावा. सुजित पाटील हे प्रामाणिक, कार्यक्षम आणि लोकाभिमुख नेते आहेत. वयाच्या 23 व्या वर्षी पंचायत समितीचे सभापती आणि 28 व्या वर्षी जिल्हा परिषदेचे उपाध्यक्ष होण्याचा मान त्यांनी मिळवला आहे. त्यांच्या नेतृत्वाखाली पारनेरचा विकास वेगाने होईल. त्यांच्या पाठीशी माझे आणि शिवसेनेचे पूर्ण बळ आहे, असे शिंदे यांनी स्पष्ट केले.
या वेळी शिंदे यांनी पारनेर तालुक्यातील मनरेगा निधी वाढवण्याचे निर्देश देण्याचे सांगितले. तसेच पारनेर पाणीपुरवठा योजनेचा डीपीआर तातडीने मंजूर करण्यात येईल आणि नगरपालिकेच्या कचरा प्रकल्पासाठी निधी उपलब्ध करून दिला जाईल, असेही त्यांनी जाहीर केले.
‘लाडकी बहीण योजना’ संदर्भात शिंदे म्हणाले की, ही योजना कोणत्याही परिस्थितीत बंद होणार नाही. मी ‘डेडिकेटेड टू कॉमन मॅन’ आहे आणि राज्यातील अडीज कोटी बहिणींचा लाडका भाऊ हीच माझी खरी ओळख आहे. त्यांनी विरोधकांवर निशाणा साधत सांगितले की, ज्यांनी विकासाला अडथळे आणले, त्यांना जनतेने नाकारले आहे. शिवसेनेचा कार्यकर्ता हा आमचा टॉनिक आहे. जो काम करेल तो पुढे जाईल, मागण्याची गरज नाही, असे सांगत शिंदे यांनी सुजित झावरे पाटील यांना पुढील राजकीय वाटचालीसाठी शुभेच्छा दिल्या.
