दौंड : बैंगलोर ते मुंबई यादरम्यान उद्यान (Daund News) एक्सप्रेस ने प्रवास करत असताना एक दाम्पत्य झोपेत असल्याचा फायदा घेऊन एका (Pune News) चोरट्याने त्यांच्याजवळील (Pune Crime) सोन्याच्या दागिन्यांसह सुमारे 10 लाख रुपयांचा मुद्देमाल चोरून नेल्याची घटना घडली आहे. हा प्रकार दौंड (जि. पुणे) रेल्वे स्थानकावर मंगळवारी (ता.16) दुपारी दोन वाजण्याच्या सुमारास उघडकीस आला आहे. दौंड लोहमार्ग पोलिसांनी या गुन्ह्याचे गांभीर्य ओळखून तपासाची चक्रे फिरवली. आणि दौंड ते मोहोळ असा 150 किलोमीटरचा थरारक पाठलाग करून गुन्हेगाराला अटक केली आहे.
चन्नाविर बस्वराज रामशेट्टी (वय 27, रा. कुभार गल्ली लक्ष्मी जवळ आळंद सुर ता उमरगाव जि कलबुर्गी राज्य कर्नाटक) असे अटक करण्यात आलेल्या आरोपीचे नाव आहे. त्याच्याकडून दोन आयफोन, दोन सोन्याचे लेडीज ब्रेसलेट तसेच रोख 33 हजार रुपये असा दहा लाखांचा मुद्देमाल हस्तगत करण्यास पोलिसांना यश आले आहे.
पोलिसांनी दिलेल्या माहितीनुसार, भाविक ललीतकुमार जैन हे स्वतःचे लग्न असल्यामुळे कुटूंबासह बैंगलोर येथे गेले होते. लग्न झाल्यानंतर ते त्यांच्या बायकोच्या घरीच थांबले. तर त्यांच्या कुटूंबातील सदस्य व इतर नातेवाईक मुंबईला परत गेले होते. फिर्यादी भाविक, त्यांची पत्नी दिव्या व तीची मैत्रीन करिष्मा असे तिघेजण मुंबईला बैंगलोर मुंबई उद्यान एक्सप्रेसने परतीचा प्रवास करत होते.
उद्यान एक्सप्रेस मंगळवारी (ता.16) सकाळी अकरा वाजण्याच्या सुमारास सोलापूर रेल्वे स्थानकावर आली. सोलापूर रेल्वे स्थानक गाडीने सुटल्यानंतर ते सर्वजण झोपी गेले. फिर्यादी भाविक जैन यांना साधारण पणे दुपारी दोन वाजण्याच्या सुमारास जाग आली. तेंव्हा त्यांनी त्यांच्या बर्थ नंबर 36 वर ठेवलेली पांढ-या रंगाची सॅकबेंग पाहिली असता ती दिसून आली नाही. त्यांनी शोध घेतला परंतु ती मिळून आली नाही.
याप्रकरणी भाविक जैन यांनी दौंड लोहमार्ग पोलीस ठाण्यात फिर्याद दिली. त्यानुसार अज्ञात चोरट्याच्या विरोधात गुन्हा दाखल करण्यात आला होता. सदर गुन्ह्याचे गांभीर्य लक्षात घेऊन पोलीस निरीक्षक राजेंद्र गायकवाड यांनी एक पथक तयार केले होते. पथकाने त्तांत्रिक विश्लेषणाच्या आधारे माहिती घेतली असता, आरोपी पुणे सोलापूर महामार्गावरून चालला असल्याचे समजले.
पोलिसांच्या पथकाने दौंड ते कुरकुंभ व पुढे पुणे सोलापुर महामार्गावरून मळद, चिंचोली, भिगवन, लोणी, इंदापुर, टेभुर्णी, वेनगाव मोहोळ असा 150 किलोमिटरचा प्रवास करून आरोपीला मंचर-अक्कलकोट एस टी (नंबर एम एच 14 एम एच 7040) बसमध्ये मोठ्या शिताफीने पकडले. त्याची अंगझडती घेतली असता, त्याच्या पॅन्टच्या उजव्या खिशात दोन आयफोन, डाव्या खिशात दोन सोन्याचे लेडीज ब्रेसलेट तसेच पॅन्ट च्या मागील खिशा मध्ये रोख 33 हजार रुपये आढळून आले. आरोपी चन्नाविर बस्वराज रामशेटटी याच्यावर गुन्हा दाखल करून अटक करण्यात आली आहे.
सदरची कामगीरी पोलीस अधिक्षक अश्विनी सानप, अप्पर पोलीस अधिक्षक रोहीदास पवार, उप विभागीय पोलीस अधिकारी मनोजकुमार यादव, पोलीस निरीक्षक राजेंद्र गायकवाड, सहाय्यक पोलीस निरीक्षक बाळासाहेब अंतरकर यांच्या मार्गदर्शनाखाली पोलीस हवालदार कोंगे, पोलीस अंमलदार आकाश चव्हाण, सजित जगताप, संदीप उसरे, व चालक संदीप काकडे यांच्या पथकाने केली आहे.
