Crime News : हरियाणातील एका निर्जन ठिकाणी ३० वर्षीय महिलेचा शिर नसलेला मृतदेह सापडल्याने संपूर्ण परिसरात खळबळ उडाली. दोन वर्षांच्या प्रेमसंबंधाचा शेवट इतक्या क्रूरपणे होईल, याची कल्पनाही कोणी केली नसेल. टॅक्सी ड्रायव्हर असलेल्या प्रियकराने दुसरे लग्न करण्याच्या हव्यासापोटी प्रेयसीची केवळ हत्याच केली नाही, तर तिचे डोके धडापासून वेगळे करून गुन्ह्याचा पुरावा मिटवण्याचा प्रयत्न केला. (crime news)
६ डिसेंबरच्या सायंकाळी बिलाल आणि उमा हे दोघे एका स्विफ्ट कारमधून निघाले. हा प्रवास तब्बल सहा तास चालला आणि तो प्रवास उमाच्या आयुष्यातील शेवटचा ठरला. बिलाल तिला घेऊन हरियाणातील यमुनानगरजवळील कालेसर राष्ट्रीय उद्यानातील एका निर्जन आणि काळोख्या ठिकाणी पोहोचला. याच लालधांग दरीत त्याने उमावर जीवघेणा हल्ला केला.
पोलिसांनी दिलेल्या माहितीनुसार, बिलालला उमापासून सुटका करून घ्यायची होती, कारण त्याचे दुसरे लग्न निश्चित झाले होते, तर उमा त्याच्यावर लग्नासाठी दबाव आणत होती. यातूनच बिलालच्या मनात क्रूरतेचा विचार आला.
बिलालने उमाची हत्या केल्यानंतर पुरावा नष्ट करण्याच्या उद्देशाने तिचे डोके धडापासून वेगळे केले आणि तो ते सोबत घेऊन तिथून पसार झाला. या राक्षसी कृत्यानंतर, कोणताही पश्चात्ताप न बाळगता तो थेट उत्तर प्रदेशातील सहारनपूर येथील घरी पोहोचला. तिथे त्याने जणू काही घडलेच नाही अशा आविर्भावात आपल्या लग्नाच्या म्हणजेच निकाहच्या तयारीला सुरुवात केली!
गुन्ह्याची ही क्रूर कहाणी उलगडत असतानाच, तपास करणाऱ्या पोलिसांच्या हाती बिलालचा धागा लागला आणि त्यांनी त्याला अटक केली. पोलिसांनी बिलालच्या ताब्यातून उमाचे कापलेले डोकेही जप्त केले आहे.
उमाच्या आयुष्याप्रमाणेच तिच्या अंताची कहाणीही विचित्र ठरली. आरोपी बिलालला अटक होण्यापूर्वी आणि डोके सापडण्यापूर्वी, ओळख न पटल्यामुळे पोलिसांनी शुक्रवारी उमाच्या शिर नसलेल्या मृतदेहाचे (धडाचे) अंतिम संस्कार केले होते. त्यानंतर रविवारी डोके सापडल्यावर ते कुटुंबाकडे सोपवण्यात आले आणि मग डोक्यावर अंत्यसंस्कार करण्याची वेळ त्यांच्यावर आली.
गुन्हेगार बिलाल सध्या पोलिसांच्या ताब्यात आहे आणि हे सर्व क्रौर्य करण्यासाठी वापरलेले शस्त्र शोधण्याचे काम सुरू आहे. या घटनेने दोन्ही राज्यांमध्ये भीतीचे वातावरण पसरले आहे.
