नाशिक: मातृत्व (Crime News) हे एका स्त्रीसाठी सर्वात मोठे वरदान असते, परंतु नाशिकमध्ये पैशांच्या हव्यासापोटी आईने केलेली एक अत्यंत मन हेलावून टाकणारे कृत्य समोर आले आहे. त्र्यंबकेश्वर तालुक्यातील टाके देवगाव बरड्याची वाडी येथील एका 45 वर्षीय महिलेने आपल्या 14 अपत्यांपैकी अनेकांची विक्री केल्याची धक्कादायक माहिती समोर आली आहे. या कृत्यामुळे संपूर्ण जिल्ह्यात संतापाची लाट उसळली आहे.
आर्थिक परिस्थितीमुळे उचलले धक्कादायक पाऊल
कुटुंबाची आर्थिक स्थिती बेताची असल्यामुळे तिने काही मुला-मुलींची विक्री केली. बच्चुबाई विष्णू हंडोगे असे या महिलेचे नाव आहे. या महिलेने वयाच्या 45 वर्षांपर्यंत 14 मुलांना जन्म दिला. हे प्रकरण उघडकीस आल्यानंतर अनेक सामाजिक कार्यकर्त्यांनी तीव्र प्रतिक्रिया व्यक्त केली आहे.
आरोग्य विभागाच्या तपासणीतून खुलासा
महिलेला नुकतेच बाळ झाले होते, परंतु त्या मुलाचे वजन फारच कमी होते. त्यामुळे, मुलाची प्रकृती पाहण्यासाठी आरोग्य विभागाने आशा कर्मचाऱ्यांना तिच्या घरी पाठवले. महिलेच्या घरी पोहोचल्यावर, कर्मचाऱ्यांच्या मनात संशयाची पाल चुकचुकली आणि त्यांना काहीतरी अनुचितघडल्याचा अंदाज आला. कसून चौकशी केल्यावर, महिलेने बाळ विक्री केल्याचे सत्य कबूल केले आणि हे गंभीर कृत्य समोर आले.
प्राप्त माहितीनुसार, या महिलेने तिच्या 14 मुलांपैकी अंदाजे सहा मुलांची विक्री केली असावी, असा प्राथमिक संशय आहे. या भयंकर खुलास्यानंतर त्र्यंबकेश्वर तालुक्यात खळबळ उडाली आहे. स्थानिक नागरिक आणि सामाजिक गट आता या संपूर्ण प्रकरणाची सखोल पोलीस चौकशी व्हावी, अशी जोरदार मागणी करत आहेत.
