Crime : नागपूर शहरातील शांतीनगर परिसरात घडलेल्या एका गंभीर घटनेमुळे महिलांच्या सुरक्षेबाबत पुन्हा प्रश्नचिन्ह निर्माण झाले आहे. शांतीनगर पोलीस ठाण्याच्या हद्दीत 20 फेब्रुवारी रोजी एका कुख्यात गुन्हेगाराने थेट महिलेच्या घरात घुसून तिला चाकूचा धाक दाखवत शरीरसुखाची मागणी केल्याचा आरोप आहे. पीडितेने ठाम नकार दिल्यानंतर आरोपीने आपला सूर बदलत ५० हजार रुपयांची खंडणी मागितली. एवढ्यावरच न थांबता तिच्या मुलाला चाकूने मारण्याची धमकी दिल्याने परिस्थिती आणखी गंभीर बनली.
पोलिसांनी दिलेल्या माहितीनुसार, सुरेंद्र उर्फ मनोज समुंद्रे (वय २७) असे आरोपीचे नाव असून तो परिसरात गुन्हेगारी पार्श्वभूमी असलेला असल्याचे सांगितले जाते. दुपारच्या सुमारास तो महिलेच्या घरात घुसला आणि सुरुवातीला जबरदस्तीचा प्रयत्न केला. महिलेनं आरडाओरड केल्यानंतर आरोपी पळून गेला; मात्र या घटनेमुळे संपूर्ण परिसरात भीतीचे वातावरण निर्माण झाले.
घटनेनंतर पीडित महिलेने तात्काळ शांतीनगर पोलीस ठाण्यात तक्रार दाखल केली. पोलिसांनी विविध कलमांखाली गुन्हा नोंदवत आरोपीला ताब्यात घेतले आहे. पुढील तपास सुरू आहे. या प्रकरणाने शहरातील सुरक्षाव्यवस्थेवर प्रश्न उपस्थित केले आहेत. घरात घुसून अशा प्रकारे धमकावण्याची हिंमत आरोपीला कशी झाली, परिसरात त्याची दहशत होती का, याचीही चौकशी अपेक्षित आहे.
महिलांविरुद्ध वाढत्या गुन्ह्यांच्या पार्श्वभूमीवर अशा घटनांकडे केवळ एक गुन्हा म्हणून न पाहता व्यापक सामाजिक आणि कायदेशीर दृष्टिकोनातून पाहण्याची गरज आहे. तक्रार करण्याचे धाडस दाखवणाऱ्या पीडितेचे कौतुक होत असले, तरी अशा घटना रोखण्यासाठी प्रतिबंधात्मक उपाय, गस्त वाढवणे आणि सराईत गुन्हेगारांवर कठोर कारवाई करणे आवश्यक असल्याची मागणी स्थानिक नागरिकांकडून होत आहे.
