Cyber Crime: हिंजवडी (Hinjwadi) परिसरातील दोन वेगवेगळ्या बनावट कॉल सेंटरवर सायबर पोलीस ठाणे व गुन्हे शाखा, युनिट-2 यांच्या संयुक्त पथकाने मोठी धडक कारवाई करत अमेरिकन नागरिकांची फसवणूक करणाऱ्या तब्बल 23 जणांना अटक केली. या कारवाईत 20 हार्डडिस्क, 3 लॅपटॉपसह मोठा इलेक्ट्रॉनिक मुद्देमाल जप्त करण्यात आला आहे. (Latest Cyber Crime)
मा. पोलीस आयुक्त विनयकुमार चौबे यांना अमेरिकन नागरिकांना लक्ष्य करणाऱ्या अवैध कॉल सेंटरची माहिती मिळाल्यानंतर सायबर पोलीस ठाणे व गुन्हे शाखेची दोन विशेष पथके तयार करून कारवाईचे आदेश देण्यात आले होते. त्यानुसार पोलीस निरीक्षक रविकिरण नाळे व अरविंद पवार यांच्या पथकांनी गोपनीय माहितीची खात्री करून हिंजवडी फेज-2 मधील दोन कार्यालयांवर छापे टाकले.
स्काय हाय सोल्युशन कॉल सेंटरवर कारवाई — 9 जण अटकेत
पहिल्या कारवाईत “स्काय हाय सोल्युशन” या कॉल सेंटरमध्ये अमेरिकेतून मेडिकल हेल्थ डिपार्टमेंटमधून बोलत असल्याचे भासवून नागरिकांना राउंड अप, झानटॅक, टाल्कम पावडर यासारख्या उत्पादनांमुळे कॅन्सरसह गंभीर आजार होतात असे सांगून त्यांची वैयक्तिक माहिती घेत असल्याचे आढळले. ही माहिती अमेरिकेतील लॉ फर्मना देऊन कमिशन मिळवत असल्याचे उघड झाले.
सदर कॉल सेंटरचे मालक सागर यादव, मॅनेजर आनंद सिन्हा व 7 कर्मचाऱ्यांना अटक करण्यात आली. गुन्हा गु.र.नं. 46/2025 अन्वये नोंदविण्यात आला.
हेही वाचा- Maithili Thakur: ‘सुरांची राणी’ झाली आमदार! मैथिली ठाकूरने पहिल्याच प्रयत्नात पटकावली आमदारकी; बनली सर्वात कमी वयाची आमदार
टेक लॉ सोल्युशन कॉल सेंटरवर छापा — 14 जण अटकेत
दुसऱ्या कारवाईत “टेक लॉ सोल्युशन” या कॉल सेंटरमध्ये बेलटॉक अॅपच्या साहाय्याने अमेरिकन नागरिकांशी संपर्क करून वेगवेगळ्या उत्पादने वापरल्याने झालेल्या साईड इफेक्टची माहिती गोळा केली जात असल्याचे समोर आले. ती माहिती परदेशातील लॉ फर्मना विकून कमिशन मिळवले जात होते.
येथील मालक धनंजय कासार, मॅनेजर हर्षद खामकर यांच्यासह 11 जणांना ताब्यात घेतले गेले. गुन्हा गु.र.नं. 47/2025 नोंदविण्यात आला आहे.
दोन्ही प्रकरणांचा तपास सायबर पोलीस ठाण्याचे पोनि रविकिरण नाळे हे करीत असून अटक आरोपींना 18 नोव्हेंबर 2025 पर्यंत पोलीस कोठडी मिळाली आहे.
ही कारवाई पोलीस आयुक्त विनयकुमार चौबे, सह आयुक्त डॉ. शशिकांत महावरकर, अपर आयुक्त सारंग आव्हाड, पोउआ डॉ. शिवाजी पवार आणि सहाय्यक पोलीस आयुक्त डॉ. विशाल हिरे यांच्या मार्गदर्शनाखाली करण्यात आली. सरकारी पक्षातर्फे अभियोजक सुरज मोहीते यांनी न्यायालयात बाजू मांडली.
