भिगवण: शासनाकडून एकीकडे (Bhigwan News) जिल्हा परिषद शाळा व अंगणवाडी मध्ये (Pune News) शिक्षण घेणाऱ्या विद्यार्थ्यांसाठी विविध योजना राबवल्या जातात. मात्र दुसऱ्या बाजुला अनेक महिन्यांपासून भिगवण येथील अंगणवाडी व जिल्हा परिषद शाळेचे वीज बिल ग्रामपंचायतने भरले नसल्याची धक्कादायक बाब समोर आली आहे. वास्तविक पाहता हे वीज बिल ग्रामपंचायतने वेळेवर भरणे गरजेचे आहे परंतु अद्याप पर्यंत हे वीज बिल न भरल्याने अंगणवाडी/शाळांना अंधाराचा सामना करावा लागणार आहे.
ग्रामपंचायतने ग्राम निधीतून थकीत वीज बिले भरावीत असे आदेश आहेत. परंतु भिगवण ग्रामपंचायतने सदरची वीज बिले न भरल्याने मोठ्या अडचणीचा सामना करावा लागणार आहे. भिगवण ग्रामपंचायतने जवळपास ८ ते ९ महिन्यांचे वीज बिल अद्याप भरले नसल्याचे निदर्शनास आलेले असून, यामुळे ग्रामपंचायतीची आर्थिक घडी विस्कटली आल्याची दबक्या आवाजात चर्चा होत आहे.
येथील अंगणवाडी क्रमांक १ ते ७ यांचे सुमारे २३ हजार २० रुपये तर जिल्हा परिषद प्राथमिक शाळा, भिगवण यांचे १३ हजार ६१०, आणि भिगवण स्टेशन येथील जिल्हा परिषद शाळेचे ७ हजार ६६० असे एकूण ४४ हजार २९० रु थकीत आहेत. वीज बिल थकल्यामुळे भविष्यात शाळांचा वीजपुरवठा खंडित होण्याच्या मार्गावर आहे. या शाळांमध्ये शेकडोंच्या संख्येने सर्वसामान्यांची,गोरगरिबांची मुले शिक्षण घेत असून या शाळांमध्ये वीजपुरवठा खंडित झाल्यास शाळेत संगणकीय ज्ञान, ई-लर्निंग सुविधा व इतर आवश्यक त्या डिजिटल सुविधा विद्यार्थ्यांना कशा मिळणार, हा अनुत्तरित प्रश्न आहे.त्यामुळे शेकडो विद्यार्थ्यांची शैक्षणिक प्रगती अंधारात येण्याची दाट शक्यता निर्माण झाली आहे.
भिगवण ग्रामपंचायतने अंगणवाडी व जिल्हा परिषद शाळेचे मागील ८ ते ९ महिन्यांचे वीज बिल अद्याप पर्यंत भरले नाही. ते लवकर न भरल्यास त्यांना रीतसर नोटीस देऊन वीज पुरवठा बंद करण्यात येईल.
— वैभव भुजबळ,(सहा.अभियंता महा.राज्य विद्युत वितरण क. भिगवण)
