Bavdhan Attack: पिंपरी-चिंचवड : पिंपरी-चिंचवड शहरातील बावधन परिसरात शर्यतीच्या बैलावरून झालेल्या जुन्या वादातून एका 20 वर्षांच्या तरुणावर दिवसाढवळ्या धारदार शस्त्रांनी हल्ला करण्यात आल्याची गंभीर घटना घडली आहे. ही घटना मंगळवारी दुपारी सुस गाव परिसरातील एका पेट्रोल पंपाजवळ घडली असून त्यामुळे परिसरात भीतीचे वातावरण निर्माण झाले आहे.
मुळशी तालुक्यातील सुस गाव येथील रहिवासी सिद्धांत कैलास मानमोडे असे जखमी तरुणाचे नाव आहे. मंगळवारी दुपारी तो सुस परिसरात असताना काही जणांनी त्याला अडवले. सुरुवातीला आरोपींनी त्याच्याशी वाद घातला आणि शिवीगाळ केली. त्यानंतर अचानक धारदार शस्त्रांनी त्याच्यावर हल्ला करण्यात आला. हल्लेखोरांनी सिद्धांतच्या डोक्यावर आणि शरीराच्या इतर भागांवर वार करत त्याला जीवे मारण्याचा प्रयत्न केल्याचे पोलिसांनी सांगितले.
या हल्ल्यात सिद्धांत गंभीर जखमी झाला असून त्याला तातडीने उपचारांसाठी जवळच्या रुग्णालयात दाखल करण्यात आले. सध्या त्याच्यावर उपचार सुरू असून त्याची प्रकृती गंभीर पण स्थिर असल्याची माहिती मिळत आहे.
पोलिस तपासात समोर आलेल्या माहितीनुसार, या हल्ल्याची पार्श्वभूमी सुमारे एका महिन्यापूर्वी झालेल्या वादात आहे. शर्यतीच्या बैलाला हाताळण्यावरून आरोपी आणि पीडित यांच्यात जोरदार वाद झाला होता. त्या घटनेनंतर आरोपींकडून सिद्धांतला मोबाईलवरून जीवे मारण्याच्या धमक्या दिल्या जात असल्याचा आरोप आहे. मंगळवारी झालेला हल्ला हा या जुन्या वादाचा परिणाम असल्याचे मानले जात आहे.
पीडित तरुणाने दिलेल्या तक्रारीवरून बावधन पोलिसांनी प्रणव काशीनाथ वाघमारे उर्फ चिव्या (वय 19, रा. पाषाण) याच्यासह इतर तिघांविरोधात गुन्हा दाखल केला आहे. तसेच क्षीरसागर नावाच्या एका व्यक्तीविरोधात आणि आणखी एका अज्ञात आरोपीविरोधातही गुन्हा नोंदवण्यात आला आहे.
पोलिसांनी या प्रकरणात खुनाचा प्रयत्न आणि बीएनएसच्या इतर संबंधित कलमांखाली गुन्हा दाखल केला असून प्रणव वाघमारे याला ताब्यात घेण्यात आले आहे. उर्वरित आरोपींचा शोध सुरू असून बावधन पोलीस अधिक तपास करत आहेत.
