नवी दिल्ली: भारतामध्ये प्रत्येक व्यक्तीसाठी आधार कार्ड आणि पॅन कार्ड ही (Aadhaar PAN Link Deadline) सर्वाधिक महत्त्वाची ओळखपत्रे आहेत. परंतु, ज्या नागरिकांनी अजूनही ही दोन्ही कागदपत्रे एकमेकांशी जोडलेली नाहीत, त्यांना मोठा आर्थिक फटका बसू शकतो. केंद्र सरकारने पॅन कार्ड आणि आधार कार्डाच्या लिंकिंगचा नियम अत्यंत कडक केला आहे. सरकारने या जोडणीसाठी अंतिम मुदत 31 डिसेंबर 2025 अशी ठरवली आहे. या निश्चित वेळेत लिंकिंग पूर्ण न केल्यास, संबंधित व्यक्तीचे पॅन कार्ड आपोआप ‘बंद’ केले जाईल. या कठोर निर्णयामुळे, अनेक लोकांच्या दररोजच्या आर्थिक व्यवहारांवर आणि कामांवर नकारात्मक परिणाम होण्याची भीती आहे.
ज्या व्यक्तींनी अद्याप आपले पॅन कार्ड आधार कार्डासोबत जोडलेले नाही, अशा सर्व नागरिकांना ही कारवाई लागू होईल. पॅन बंद करण्यात आल्यास अनेक संबंधित सेवांवरही निर्बंध येऊ शकतात. कर प्रणालीमध्ये पारदर्शकता वाढवण्यासाठी आणि बनावट कार्ड्सचा गैरवापर थांबवण्यासाठी सरकारने हा निर्णय घेतला आहे. यामुळे आर्थिक गैरव्यवहारांना आळा घालण्यास मदत होईल.
तुमचे पॅन कार्ड आधारशी जोडण्यासाठी आयकर विभागाच्या अधिकृत ई-फायलिंग पोर्टलला भेट द्यावी. वेबसाईटच्या ‘Quick Links’ विभागात ‘Link Aadhaar’ नावाचा पर्याय उपलब्ध आहे. या पर्यायावर क्लिक करून सर्व आवश्यक माहिती भरून अटी स्वीकारल्यानंतर आणि कॅप्चा कोड टाकल्यानंतर, ही प्रक्रिया पूर्ण होईल.
सरकारने हे स्पष्ट केले आहे की, 31 डिसेंबर 2025 नंतर कोणतीही सूट किंवा मुदतवाढ दिली जाणार नाही. त्यामुळे वेळेत प्रक्रियापूर्ण करणे बंधनकारक आहे.
