मुंबई : बँकिंग क्षेत्रात करिअर करू इच्छिणाऱ्या उमेदवारांसाठी एक सुवर्णसंधी उपलब्ध झाली आहे. भारतातील सर्वात मोठ्या बँकांपैकी एक असलेल्या स्टेट बँक ऑफ इंडिया (SBI) मध्ये ‘स्पेशलिस्ट कॅडेअर ऑफिसर (Specialist Cadre Officer – Regular Basis)’ या पदांसाठी भरती प्रक्रिया सुरू झाली आहे. ही भरती ८ ऑक्टोबर २०२५ पासून (SBI Recruitment 2025)सुरू झाली असून, इच्छुक उमेदवारांना २८ ऑक्टोबर २०२५ पर्यंत अर्ज करता येणार आहे.
या भरतीत एकूण ३ पदे भरण्यात येणार असून, ती डेप्युटी मॅनेजर (इकोनॉमिस्ट) या पदांसाठी आहेत. ही भरती MMGS-II ग्रेडसाठी केली जाणार आहे. इच्छुक आणि पात्र उमेदवारांना अर्ज करण्यासाठी SBI च्या अधिकृत वेबसाइट sbi.co.in वर ऑनलाईन अर्ज सादर करावा लागणार आहे.
हेही वाचा : पुण्यातील IIITमध्ये नोकरीची संधी! इंजिनियर उमेदवारांसाठी भरती; जाणून घ्या सर्व तपशील
या पदांसाठी अर्ज करणाऱ्या उमेदवारांकडे अर्थशास्त्र विषयात मास्टर्स डिग्री असणे आवश्यक आहे. तसेच इकोनॉमेट्रिक्स, मॅथेमॅटिकल इकोनॉमिक्स किंवा फायनान्शियल इकोनॉमिक्स मध्ये पदवी घेतलेले उमेदवारही या भरतीस पात्र आहेत. उमेदवाराची वयोमर्यादा १८ ते ३० वर्षांपर्यंत निश्चित करण्यात आली आहे.
या भरतीची सर्वात मोठी खासियत म्हणजे या नोकरीसाठी कोणतीही लेखी परीक्षा घेतली जाणार नाही. उमेदवारांची निवड शॉर्टलिस्टिंग, मुलाखत आणि मेरिट लिस्ट यांच्या आधारे केली जाणार आहे. त्यामुळे परीक्षेशिवाय थेट मुलाखतीच्या माध्यमातून नोकरीची संधी मिळणार आहे.
निवड झालेल्या उमेदवारांना आकर्षक वेतन पॅकेज देण्यात येणार असून, त्यांना ₹64,820 ते ₹93,960 रुपयांपर्यंत मासिक पगार मिळणार आहे. बँकिंग क्षेत्रातील स्थिर आणि प्रतिष्ठित करिअर शोधणाऱ्या उमेदवारांसाठी ही अत्यंत उत्तम संधी मानली जात आहे.
या भरतीसंदर्भात बँकेने अधिकृत अधिसूचना जारी केली असून, अर्ज करण्यापूर्वी उमेदवारांनी ती काळजीपूर्वक वाचावी. SBI मध्ये परीक्षेशिवाय चांगला पगार आणि प्रतिष्ठित पदावर नोकरी मिळवण्याची ही सुवर्णसंधी असून अर्ज करण्याची शेवटची तारीख २८ ऑक्टोबर २०२५ आहे.
हेही वाचा : पुणे पोलिस दलातील पदवाटपावरून संघर्ष; शिपाई भरतीची प्रक्रिया रखडली, पुण्याची नवीन पदे किती?
