पुणे: टाचांना भेगा (Cracked Heels) पडण्याच्या समस्येचा सामना अनेकांना करावा लागतो. वेळीच लक्ष न दिल्यास या भेगा वाढून त्यातून रक्त येणे किंवा चालताना तीव्र वेदना होणे असे प्रकार घडतात. महागड्या क्रीम्स वापरण्यापेक्षा आपल्या स्वयंपाकघरातील काही नैसर्गिक गोष्टींचा वापर करून तुम्ही या समस्येपासून कायमची सुटका मिळवू शकता.
मधामध्ये नैसर्गिक आर्द्रता असते, तर कोरफड त्वचा मऊ करण्यास मदत करते. एक चमचा मध आणि एक चमचा कोरफड जेल एकत्र करून भेगा पडलेल्या टाचांवर लावावे. २० मिनिटांनी पाय धुवून टाकावेत. हा उपाय नियमित केल्यास टाचांमधील भेगा भरून येण्यास मदत होते.
खोबरेल तेल वापर हा एक अत्यंत जुना आणि प्रभावी उपाय आहे. रात्री झोपण्यापूर्वी खोबरेल तेल भेगांमध्ये भरावे. त्यानंतर सुती पायमोजे घालून झोपावे. सकाळी कोमट पाण्याने पाय धुवावेत. यामुळे अवघ्या ३ ते ४ दिवसांत टाचांना पडलेल्या भेगा कमी होतात.
पिकलेले केळे मॅश करून त्यात थोडे ऑलिव्ह ऑईल मिसळावे. ही पेस्ट टाचांवर १५ मिनिटे लावून ठेवावी. केळ्यातील पोषक तत्वे त्वचेला आतून पोषण देतात, ज्यामुळे त्वचा कोरडी पडत नाही.
केवळ वरून उपाय करून चालत नाही, तर शरीरात पाण्याची कमतरता भासल्यास देखील त्वचा कोरडी पडते. त्यामुळे दिवसातून किमान ८ ते १० ग्लास पाणी प्यावे. तसेच आहारात ओमेगा-३ फॅटी ॲसिड असलेल्या पदार्थांचा समावेश करावा.
टाचांच्या भेगा ही केवळ सौंदर्याची समस्या नसून ती आरोग्याशी निगडित आहे. जर भेगांमधून रक्त येत असेल किंवा जखम झाली असेल, तर घरगुती उपायांसोबतच डॉक्टरांचा सल्ला घेणे आवश्यक आहे.
