पुणे प्राईम न्यूज: केंद्रीय रस्ते व वाहतूक मंत्री नितीन गडकरी हे त्यांच्या कामासाठी ओळखले जातात. नितीन गडकरी हे देशाच्या राजकारणातील एक मोठे नाव आहे. देशातील रस्ते वाहतूक आणि महामार्गांसाठी सर्वाधिक काळ काम करणाऱ्या नितीन गडकरी यांची ओळख ‘हायवे मॅन ॲाफ इंडिया’ अशी देखील आहे. देशाच्या विकासासाठी कायमच योगदान देणाऱ्या नितीन गडकरी यांच्या आयुष्यावर आधारित ‘गडकरी’ हा चित्रपट लवकरच प्रेक्षकांच्या भेटीला येत आहे.
नुकतेच ‘गडकरी’ या चित्रपटाचे पहिले पोस्टर सोशल मीडियावर प्रदर्शित करण्यात आले आहे. या चित्रपटाचे अक्षय अनंत देशमुख हे निर्माते आहेत. तर या चित्रपटाचे कथा, पटकथा आणि दिग्दर्शन अनुराग राजन भुसारी यांनी केले आहे. ‘गडकरी’ चित्रपटामध्ये नितीन गडकरींची भूमिका कोण साकारणार? हे जाणून घेण्यासाठी प्रेक्षक कमालीचे उत्सुक आहेत. ‘गडकरी’ या चित्रपटाच्या ट्रेलरची आणि टीझरची प्रेक्षक आता मोठ्या उत्सुकतेने प्रतीक्षा करत आहेत.
या चित्रपटाबद्दल बोलताना दिग्दर्शक अनुराग भुसारी म्हणाले, “नितीन गडकरी यांची राजकारणातील कारकिर्द ही उल्लेखनीय आहे. त्यांची ओळख अभ्यासू, प्रभावी वक्ता, कणखर, निरपेक्ष विचार करणारा नेता, रस्ता सुधारणा प्रवर्तक अशी आहे. गडकरींच्या व्यक्तिमत्वाच्या या विविध बाजू जनतेला माहितच आहेत. समाज कल्याणाचा ध्यास असणाऱ्या या नेत्याचा राजकारणातील प्रवास बऱ्यापैकी अनेकांना माहीत आहे. मात्र, नितीन गडकरी यांचे वैयक्तिक आयुष्य व तरुण काळ तितकाच रंजक आहे. त्यांचा जीवनप्रवास प्रेक्षकांसमोर मांडण्याचा प्रयत्न या चित्रपटातून करण्यात आला आहे.”
गडकरी यांच्या आयुष्यावरील हा चित्रपट २७ ऑक्टोबर रोजी प्रदर्शित होणार आहे. चित्रपटाचे दिग्दर्शक अनुराग भुसारी आहेत. मात्र, चित्रपटात मुख्य भूमिका कोण साकारत आहे, याबाबत अद्याप कोणताही खुलासा करण्यात आलेला नाही.
