मुंबई: बॉलीवूडमधील सर्वात लोकप्रिय चित्रपटांपैकी एक असलेल्या ‘3 इडियट्स’ चित्रपटाच्या चाहत्यांसाठी एक मोठी अपडेट समोर येत आहे. 2009 मध्ये आलेल्या हा चित्रपट मैत्री आणि शिक्षणाची पद्धत यावर आधारित होता. आता तब्बल 16 वर्षांनंतर या चित्रपटाचा दुसरा भाग म्हणजेच सिक्वेल प्रेक्षकांच्या (3 Idiots Sequel) भेटीला येण्याची शक्यता आहे. मीडिया रिपोर्टनुसार, दिग्दर्शक राजकुमार हिरानी यांनी या चित्रपटाची स्क्रीप्ट पूर्ण केली असून, 2026 मध्ये या सिनेमाचे शूटिंग सुरू होऊ शकते. आमिर खान आणि राजकुमार हिरानी यांनी या प्रकल्पावर काम सुरू केल्याचे बोलले जात आहे.
या चित्रपटात ‘राजू रस्तोगी’ची भूमिका साकारणारा अभिनेता शर्मन जोशी याने नुकत्याच दिलेल्या मुलाखतीत यावर भाष्य केले आहे. शर्मनने सांगितले की, या चित्रपटाचा सिक्वेल यावा अशी त्याची मनापासून इच्छा आहे, मात्र अद्याप त्याला अधिकृतपणे कोणतीही माहिती देण्यात आलेली नाही. शर्मनच्या मते, जर कथेमध्ये खरोखरच ताकद असेल, तर आमिर खान, राजकुमार हिरानी आणि लेखक अभिजात जोशी यावर नक्कीच काम करतील.
विशेष म्हणजे, राजकुमार हिरानी हे आधी दादासाहेब फाळके यांच्या जीवनावर चित्रपट बनवणार होते, पण सध्या तो प्रकल्प बाजूला ठेवून ‘3 इडियट्स 2’ वर लक्ष केंद्रित करण्यात येत असल्याची चर्चा आहे. या दुसऱ्या भागात जुन्या पात्रांची मैत्री 15 वर्षांनंतर कशी असेल, हे दाखवले जाण्याची शक्यता आहे. आमिर खान, आर. माधवन, करीना कपूर आणि शर्मन जोशी हे कलाकार पुन्हा एकदा एकत्र दिसतील, अशी आशा प्रेक्षक व्यक्त करत आहेत. जरी अद्याप निर्मात्यांनी कोणतीही अधिकृत घोषणा केली नाही.
