पुणे : महाराष्ट्र राज्य परीक्षा परिषदेच्या वतीने घेण्यात आलेल्या शिक्षक पात्रता परीक्षेचा (टीईटी) अंतरिम निकाल परिषदेच्या वेबसाईटवर प्रसिद्ध करण्यात आला आहे. विद्यार्थ्यांना त्यांचा निकाल वेबसाइटवर पाहता येणार आहे. टीईटी परीक्षा राज्यात १० नोव्हेंबरला राज्यातील विविध परीक्षा केंद्रांवर झाली. या परीक्षेसाठी (पेपर १ आणि पेपर २) राज्यातील एकूण तीन लाख ५३ हजार उमेदवारांनी नोंदणी केली होती.
या निकालाच्या अनुषंगाने गुणपडताळणी करायची असल्यास किंवा निकालाबाबत काही आक्षेप असल्यास, ते विद्यार्थ्यांना त्यांच्या खात्यामधून सहा फेब्रुवारीपर्यंत नोंदवता येणार आहे. त्याचप्रमाणे विद्यार्थ्यांचे निकाल राखीव ठेवण्यात आल्यास, त्यांनीही आपले म्हणणे सहा फेब्रुवारीपर्यंत mahatet24msce@gmail.com या ईमेलवर पाठवावे. त्यानंतर आलेल्या निवेदनांचा विचार करण्यात येणार नसल्याचे परिषदेच्या आयुक्त अनुराधा ओक यांनी सांगितले. ही प्रक्रीया पूर्ण झाल्यानंतर, टीईटीचा अंतिम निकाल जाहीर करण्यात येईल, असे सांगण्यात आले आहे.
