मुंबई : ऑनलाईन म्युझिक स्ट्रीमिंग सर्व्हिस प्रोव्हायडर कंपनी स्पॉटिफायने वाढता खर्च कमी करण्यासाठी जगभरातील 17 टक्के म्हणजेच 1500 कर्मचाऱ्यांना काढण्याचा निर्णय घेतला आहे. वाढता तोटा कमी करुन कंपनीला फायद्यात आणण्यासाठी हा निर्णय घेतल्याचे कंपनीने म्हटले आहे.
स्पॉटिफायची या वर्षातील तिसरी कामगार कपात आहे. यापूर्वी जानेवारी महिन्यात कंपनीने सहा टक्के कर्मचाऱ्यांना आणि जूनमध्ये दोन टक्के कर्मचाऱ्यांना कामावरुन काढले होते. स्पॉटिफाय कंपनीचे चीफ एक्झुकेटिव्ह ऑफीसर डॅनियल इक यांनी कंपनीच्या ब्लॉगवर 17 टक्के कर्मचाऱ्यांना कामावरुन काढण्याची घोषणा केली आहे. नोकऱ्यांमधील ही कपात धोरणांतर्गत केली जात आहे.
कंपनीचे मुख्य कार्यकारी अधिकारी (सीईओ) डॅनियल यांनी आपल्या पोस्टमध्ये कंपनीतून किती कर्मचाऱ्यांना काढणार याबाबतची संख्या अद्याप सांगितलेली नाही. मात्र, कंपनीच्या एका प्रवक्त्याने जगभरातून 1500 कर्मचाऱ्यांना हटविण्यात येणार असल्याचे स्पष्ट केले आहे. स्टॉकहोम स्थित कंपनीने साल 2023 मध्ये सप्टेंबरपर्यंत सुमारे 50 कोटी डॉलरचा (4168 कोटी) तोटा झाल्याचे म्हटले आहे.
स्पॉटिफायने कोविड-19 च्या काळात कर्मचारी, कंटेट आणि मार्केटिंगवर 2020 आणि 2021 मध्ये मोठ्या प्रमाणात गुंतवणूक केली होती. मात्र, यासाठी कंपनीने स्वस्तात कर्ज घेतले होते. परंतु, नंतर व्याजदरात वाढ झाल्याने कंपनीची अडचण वाढली आहे.
