पुणे : पुण्यातील प्रसिद्ध बांधकाम व्यावसायिक विशाल अग्रवाल यांचा मुलगा केतन अग्रवाल याची काही दिवसापूर्वी लोहगडावरून ढकलून देऊन हत्या करण्यात आली होती.या प्रकरणातील मुख्य आरोपी सिया गोयल हिने ही हत्या पूर्ण तयारीनिशी केल्याचे तपासात स्पष्ट झाले आहे. तांत्रिक तपासादरम्यान मिळालेल्या माहितीनुसार, सियाने तिचा प्रियकर चेतन चौधरी याच्या मदतीने हा संपूर्ण कट रचला होता. विशेष म्हणजे, गुन्हा केल्यानंतर पोलिसांच्या कचाट्यातून कसे सुटायचे, याचा अभ्यास तिने आधीच गुगलवर केला होता.
या गुन्ह्याची आखणी करण्यासाठी सियाने ‘मेघालय हनीमून मर्डर केस’चा सविस्तर अभ्यास केला होता. या प्रकरणातील आरोपी सोनम रघुवंशी हिने प्रियकराच्या मदतीने पती राजा रघुवंशीचा खून कसा केला आणि त्यानंतर काय काय घडले, याची माहिती सियाने गुगलवर शोधली होती. पकडले गेल्यास जामीन कसा मिळवायचा, याचेही नियोजन तिने करून ठेवले होते.
केतनला संपवल्यानंतर सोनमप्रमाणे आपल्यालाही पोलिसांनी पकडलं तर जामीन मिळवण्यासाठी सोनमच्याच मार्गाने जाण्याचा विचार सियाच्या डोक्यात सुरु असल्याचं तांत्रिक तपासातून समोर आलं आहे. सोनमला जामीन कसा मिळाला होता? यासाठी नेमक्या कोणत्या गोष्टींचा विचार करण्यात आला? या साऱ्याची माहितीही सियाने गुगलवरुन शोधल्याचं समोर आलं आहे.
दरम्यान सोनम रघुवंशी आणि सिया गोयल या दोन्ही प्रकरणांमध्ये कमालीचे साम्य दिसून आले आहे. दोघींनीही घरच्यांनी ठरवलेल्या किंवा लग्न झालेल्या जोडीदाराचा काटा काढला.दोन्ही घटनांमध्ये जोडीदाराला उंचावरून खोल दरीत ढकलून देण्यात आले.या कृत्यामध्ये दोघींनाही त्यांच्या प्रियकरांनी पूर्ण साथ दिली.
याच माहितीच्या आधारे सियाने केतनला संपवण्याचा प्लॅन केला. १८ जून रोजी ती केतनसोबत लोहगडावर फिरायला गेली आणि संधी साधून त्याला दरीत ढकलून दिले. सुरुवातीला हा निव्वळ एक अपघात वाटत होता. मात्र, पोलिसांनी तांत्रिक आणि सायबर तपास सुरू केल्यानंतर सिया आणि चेतनचा हा भयानक कट समोर आला.
सध्या न्यायालयाने सिया आणि चेतन या दोघांनाही १४ दिवसांची न्यायालयीन कोठडी सुनावली असून, पोलीस या प्रकरणाचा पुढील तपास करत आहेत.
