बारामती : बारामती येथे एका तरुणाने स्वतःवर गोळी झाडून आत्महत्येचा प्रयत्न केल्याची धक्कादायक घटना उघडकीस आली आहे. शनिवारी दुपारी साडेतीन वाजण्याच्या सुमारास बारामतीमधील सूर्यानगरी लेन क्रमांक 5 मधील ‘जयश्री अपार्टमेंट’मध्ये हा प्रकार घडला. आविष्कार ढोले (वय 28, मूळ रा. पंढरपूर) असे या गंभीर जखमी झालेल्या तरुणाचे नाव असून, त्याच्यावर सध्या पुण्यातील ससून रुग्णालयातील अतिदक्षता विभागात उपचार सुरू आहेत.
मिळालेल्या माहितीनुसार, आविष्कार हा सूर्यानगरी परिसरातील एका भाड्याच्या खोलीत राहत होता. शनिवारी दुपारी अचानक त्याच्या खोलीतून गोळीबाराचा प्रचंड आवाज आला. या अचानक झालेल्या आवाजामुळे इमारतीमधील नागरिक घाबरून बाहेर आले आणि परिसरात मोठी खळबळ उडाली. स्थानिक रहिवाशांनी तातडीने या घटनेची माहिती पोलिसांना दिली.
घटनेची बातमी मिळताच बारामती पोलीस ठाण्याच्या पथकाने तत्काळ घटनास्थळी धाव घेतली. रक्ताच्या थारोळ्यात पडलेल्या आविष्कारला पोलिसांनी लगेचच उपचारासाठी ताब्यात घेतले. सुरुवातीला स्थानिक रुग्णालयात प्राथमिक उपचार केल्यानंतर, त्याची गंभीर अवस्था पाहून त्याला पुढील उपचारासाठी पुण्याच्या ससून रुग्णालयात हलवण्यात आले.
स्थानिक पोलिसांनी दिलेल्या प्राथमिक माहितीनुसार, हा आत्महत्येचा प्रयत्न असावा असा अंदाज आहे. मात्र, या तरुणाने हे अत्यंत टोकाचे पाऊल का उचलले, याचे स्पष्ट कारण अद्याप समोर आलेले नाही. पोलिसांनी घटनास्थळावरून गुन्ह्यात वापरलेले पिस्तूल आणि काही महत्त्वाचे पुरावे जप्त केले आहेत.
हे पिस्तूल बेकायदेशीर होते की परवानाधारक, याचा शोध आता पोलीस घेत आहेत. तसेच घटनेपूर्वी आविष्कार कोणाच्या संपर्कात होता, या दृष्टीने त्याच्या मोबाईल आणि हालचालींची सखोल चौकशी सुरू आहे. या घटनेमुळे परिसरात विविध प्रकारच्या चर्चांना उधाण आले आहे.
