सूरत: सूरत शहरातील जिल्हा पंचायत क्वार्टरमध्ये राहणाऱ्या अल्पेश सोळंकी (वय अंदाजे ४०) या शारीरिक शिक्षण शिक्षकाने पत्नीच्या विवाहबाह्य संबंधांना कंटाळून स्वतःच्या दोन चिमुकल्या मुलांना विष देऊन संपवले आणि नंतर गळफास घेऊन आत्महत्या केली. या मन हेलावून टाकणाऱ्या घटनेने सूरतमधील दिंडोली परिसर हादरून गेला आहे.
आत्महत्येपूर्वी लिहिलेल्या चिठ्ठीने उलगडले सत्य
पोलिसांना घटनास्थळी ८ पानांची एक सुसाईड नोट, तसेच २ हाताने लिहिलेल्या डायऱ्या सापडल्या. एक डायरी आई-वडील आणि भावंडांबद्दल, तर दुसरी पत्नी फाल्गुनी आणि तिच्या कथित प्रियकर नरेश राठोडबद्दल होती. या नोटमध्ये अल्पेश यांनी लिहिले आहे की, पत्नीच्या विवाहबाह्य संबंधांमुळे गेल्या काही वर्षांपासून तो मानसिक छळ सहन करत होता. त्या नात्यात वारंवार संधी दिल्यावरही फाल्गुनीने संबंध तोडले नाहीत.
मुलांना विष देऊन संपविल्यानंतर अल्पेश यांनी त्यांच्या मृतदेहाजवळ बालपणातील फोटो ठेवले, आणि शांतपणे घरात गळफास घेतला. घटनेच्या दिवशी त्यांची पत्नी फाल्गुनी घरी नव्हती. अल्पेश आणि फाल्गुनी लवकरच नव्या घरात शिफ्ट होणार होते, मात्र त्याआधीच ही हृदयद्रावक घटना घडली. पोलिसांच्या तपासात अल्पेश यांनी स्वतःची आपबीती कथन करणारी तीन व्हिडीओ क्लिप्स मोबाईलमध्ये रेकॉर्ड केल्याचे समोर आले. यामध्ये त्यांनी फाल्गुनी आणि नरेश राठोड यांच्या संबंधांबद्दल, मुलांचा विचार करून घेतलेला निर्णय, आणि स्वतःवर झालेल्या मानसिक अत्याचारांविषयी स्पष्ट वर्णन केले आहे.
सर्व पुरावे हाती आल्यानंतर पोलिसांनी फाल्गुनी सोळंकी आणि तिचा सहकारी प्रियकर नरेश राठोड (जिल्हा पंचायत शिक्षण विभाग कर्मचारी) यांना अटक केली आहे. या दोघांविरोधात खुनास प्रवृत्त केल्याचा आणि आत्महत्येस कारणीभूत ठरल्याचा गुन्हा दाखल करण्यात आला आहे. अल्पेश हे मूळचे साबरकांठा तालुक्यातील रहिवासी होते आणि गेल्या काही वर्षांपासून सूरतमध्ये वास्तव्यास होते. दिंडोली येथील शाळेत ते पीटी (शारीरिक शिक्षण) शिक्षक म्हणून कार्यरत होते. त्यांच्या पत्नी फाल्गुनी जिल्हा पंचायत शिक्षण विभागात वरिष्ठ लिपिक म्हणून काम करत होती.
