छत्रपती संभाजीनगर : छत्रपती संभाजी नगरच्या समृद्धी महामार्गावर एका ट्रॅव्हल्स बस आणि ट्रकचा भीषण अपघात झाला असून या अपघातात बारा जणांचा मृत्यू झाला असून यात काही लहान बालकांचा देखील समावेश आहे. समृद्धी महामार्गाच्या वैजापूर येथील जांबरगाव टोल नाक्याजवळ रात्री एक ते दीड वाजण्याच्या सुमारास हा अपघात झाला आहे.
तनुश्री लखन सोळसे ( वय ५ वर्षे, रा. समतानगर,नाशिक), संगीता विलास आठवले (वय ४० वर्षे,वणसगाव, निफाड, नाशिक), अंजाबाई रमेश जगताप (वय ३८ वर्षे, रा. राजूनगर नाशिक), रतन जमधडे (वय ४५ वर्षे, संत कबीर नगर नाशिक), काजल लखन सोळसे (वय ३२ वर्षे, गवळाणी नाशिक), रजनी गौतम तपासे (वय ३२ वर्षे, गवळाणी नाशिक),
हौसाबाई आनंदा शिरसाट (वय ३० वर्ष, उजगाव निफाड, नाशिक), झुंबर काशिनाथ गांगुर्डे (वय ५० वर्षे, रा. राजूनगर नाशिक), अमोल झुंबर गांगुर्डे (वय १८ वर्षे), सारिका झुंबर गांगुर्डे (वय ४० वर्षे), मिलिंद पगारे (वय ५० वर्षे, कोकणगाव ओझर, निफाड, नाशिक), दीपक प्रभाकर केकाणे (वय ४७ वर्षे, रा. बसमत पिपळगाव, नाशिक) असे अपघातात मृत्यू झालेल्या व्यक्तींची नावे आहेत.
मिळालेल्या माहितीनुसार, ट्रॅव्हल्स बसमधील प्रवासी बुलढाणा जिल्ह्यातील सैलानी बाबा येथील दर्ग्याचे दर्शन घेऊन परत निघाले होते. छत्रपती संभाजीनगरच्या समृद्धी महामार्गावरील जांबरगाव टोलनाक्याजवळ ट्रॅव्हल्स बसने ट्रकला मागून जोरात धडक दिली. हा अपघात एवढा भीषण होता की, अपघातात दहा ते बारा जणांचा जागीच मृत्यू झाला आहे.
दरम्यान, या अपघातात मृत व्यक्तींमध्ये काही लहान मुलांचा देखील समावेश आहे. हे सर्व भाविक नाशिक जिल्ह्यातील आहेत. अपघाताची माहिती मिळताच वैजापूरसह आजूबाजूच्या गावातील नागरिकांनी घटनास्थळी धाव घेतली. अपघातग्रस्तांना तात्काळ मदत करण्यात आली. सर्व जखमींना रुग्णवाहिकेतून शासकीय रुग्णालयात दाखल करण्यात आले. तसेच, घटनास्थळी समृद्धी महामार्गावरील बचाव पथक, वैजापूर पोलीस देखील दाखल झाले असून, मदतकार्य सुरू आहे.
