Pune News : पुणे विमानतळावर गुरुवारी मध्यरात्री दीड वाजेच्या सुमारास एक अत्यंत गंभीर आणि थरारक घटना घडली. विमानतळाच्या धावपट्टीजवळ चक्क एक बिबट्या (leopard) अचानक शिरला आणि त्यामुळे विमानतळासारख्या संवेदनशील आणि सुरक्षित ठिकाणी बिबट्या आल्यामुळे कर्मचाऱ्यांमध्ये आणि प्रवाशांमध्ये भीतीचे वातावरण निर्माण झाले. या गंभीर परिस्थितीमुळे विमानतळ प्रशासनाने तातडीने हालचाली करत बिबट्याला पकडण्यासाठी वन विभागाची मदत घेतली आहे. pune news
मिळालेल्या माहितीनुसार गुरुवारी रात्रीच्या सुमारास ही घटना उघडकीस आली. विमानतळावर (pune airport) गस्त घालत असलेल्या सुरक्षा कर्मचाऱ्यांनी बिबट्याला धावपट्टीजवळ फिरताना पाहिल्यानंतर त्यांनी लगेचच ही माहिती वरिष्ठांना कळवली. बिबट्याचा धोका लक्षात घेऊन, सुरक्षेचा उपाय म्हणून तात्पुरत्या स्वरूपात काही विमानांचे उड्डाण आणि लँडिंग थांबवण्यात आले. बिबट्या विमानतळ परिसरात असल्याने मोठी धावपळ उडाली. परिस्थितीचे गांभीर्य पाहून बिबट्याला सुरक्षितपणे जेरबंद करण्यासाठी वन विभागाच्या कर्मचाऱ्यांनी तात्काळ शोध मोहीम सुरू केली आहे.
विमानतळाच्या सुरक्षेवर प्रश्नचिन्ह
पुणे विमानतळालगतचा परिसर वनक्षेत्राच्या जवळ असल्यामुळे बिबट्या या भागात येण्याची शक्यता असते पण थेट धावपट्टीजवळ तो आढळून आल्याने ही घटना दुर्लक्ष करण्यासारखी नाही. या प्रकारामुळे विमानतळाच्या सुरक्षेवर प्रश्नचिन्ह उभे राहिले आहे. बिबट्याला पकडल्यानंतर त्याला वनविभागाकडून योग्य त्या ठिकाणी सुरक्षितपणे सोडले जाईल असे वन विभागाने स्पष्ट केले आहे. या घटनेमुळे वन्यजीवांकडून होणारा धोका आणि विमान वाहतूक सुरक्षेचा मुद्दा पुन्हा एकदा ऐरणीवर आला आहे.
