Pune News : पुणे : इंस्टाग्रामवर झालेल्या ओळखीतून गणेशोत्सवासाठी पुण्यातून सांगली येथे गेलेल्या एका १६ वर्षीय अल्पवयीन मुलीवर बलात्कार करण्यात आल्याची खळबळजनक घटना नुकतीच उघडकीस आली आहे. याप्रकरणी एका २० वर्षीय तरुणाविरोधी सिंहगड रोड पोलीस ठाण्यात गुन्हा दाखल करण्यात आला आहे.
गुन्हा दाखल
अनिकेत सुरेश माने (वय २०, रा. बत्तीस शिराळा, ता. शिराळा, जि. सांगली) असे गुन्हा दाखल झालेल्या तरुणाचे नाव आहे. याप्रकरणी मुलीच्या आईने फिर्याद दिली आहे.
पोलिसांनी दिलेल्या माहितीनुसार, पीडित मुलगी सोळा वर्षांची असून पुण्यातील एका महाविद्यालयामध्ये इयत्ता बारावी मध्ये शिकते. ती गणेश उत्सवाकरिता तिच्या मामाकडे सांगलीला गेली होती. आरोपी अनिकेत माने याची इंस्टाग्राम वरून ओळख झालेली होती. आरोपी अनिकेत याने या तरुणीला भेटायला बोलावले.
यावेळी आरोपीने मुलीला बदनामी करण्याची धमकी देऊन जबरदस्तीने शारीरिक संबंध प्रस्थापित केले. मुलीने विरोध करताच तिला हाताने मारहाण केली. तसेच पीडित तरुणीला तिथेच सोडून हा आरोपी तेथून पसार झाला.
दरम्यान, तिने घडलेला सर्व प्रकार मामाला सांगितला. त्यानंतर हे कुटुंब पुण्याला आले. या संदर्भात आई-वडिलांना माहिती दिल्यानंतर त्यांनी सिंहगड रोड पोलीस ठाण्यामध्ये फिर्याद दाखल केली आहे. पुढील तपास सहायक पोलीस निरीक्षक भारत चंदनशिव करीत आहेत.
