पुणे: पुणे जिल्ह्यातील हवेली तालुक्यातील डोंगरगाव येथे एक हृदयद्रावक घटना घडली आहे. अवघ्या तीन महिन्यांपूर्वी लग्न झालेल्या १८ वर्षीय नवविवाहितेने पती व सासूच्या शारीरिक आणि मानसिक छळाला कंटाळून गळफास घेऊन आत्महत्या केली. या प्रकरणात पोलिसांनी पती व सासूला अटक केली आहे.
मृत नवविवाहिता राणी मुंजाजी घाडगे (वय १८, रा. डोंगरगाव, ता. हवेली) अशी आहे. याबाबत तिचा मामा महादेव कदम (वय ४१, रा. साईनगर, चंदननगर, मुळ रा. गंगाखेड, जि. परभणी) यांनी लोणीकंद पोलिस ठाण्यात फिर्याद दिली आहे. त्यानुसार पोलिसांनी पती भागवत अंकुश कदम (वय २४) व सासू मुक्ता अंकुश कदम (वय ४५, दोघेही रा. डोंगरगाव) यांना अटक केली आहे. हा प्रकार २४ मे ते ८ ऑगस्ट २०२५ या कालावधीत राहत्या घरी घडला.
पोलिसांनी दिलेल्या माहितीनुसार, राणी घाडगे हिचा विवाह ३ महिन्यांपूर्वी भागवत कदम याच्याशी झाला होता. विवाहानंतर काही दिवसांतच पती व सासूने तिच्या चारित्र्यावर संशय घेत वारंवार मारहाण केली. “तू जा, मर” असे अपमानास्पद शब्द तिला ऐकावे लागले. तिचा मोबाईल फोन फोडून टाकण्यात आला व कोणाशीही बोलू न देणे, घरात एकटे ठेवणे, असे प्रकार करण्यात आले. सततच्या या शारीरिक व मानसिक छळाला कंटाळून राणीने गळफास घेऊन आत्महत्या केली. या घटनेनंतर लोणीकंद पोलिसांनी तात्काळ कारवाई करत पती व सासूला अटक केली. पुढील तपास सहायक पोलिस निरीक्षक विजया वंजारी करीत आहेत.
