Pune Crime : पुणे शहरात सायबर गुन्हेगारी मोठ्या प्रमाणात वाढत आहे. सायबर गुन्हेगारांचाही (Cyber Criminals) मोठ्या प्रमाणावर सुळसुळाट पहायला मिळतोय. जास्त परतावा मिळेल म्हणून गोड बोलून त्यांनी शहरातील लोकांची मोठ्या पैशांची फसवणूक केलीये. धक्कादायक बाब म्हणजे, केवळ एकाच दिवशी दोन वेगवेगळ्या घटनांमध्ये सायबर चोरट्यांनी तब्बल ३९ लाख ५६ हजार रुपयांहून अधिक रकमेवर डल्ला मारला आहे. यामध्ये एका तरुणीला ‘ऑनलाइन टास्क’च्या नावाखाली १२ लाखांहून अधिक, तर एका व्यक्तीला ‘शेअर मार्केट’मध्ये गुंतवणुकीच्या नावाने २७ लाखांहून अधिक रकमेचा गंडा घालण्यात आला आहे. Pune Crime
ऑनलाइन टास्कच्या जाळ्यात तरुणीची १२ लाखांची फसवणूक
पुण्यातील विश्रांतवाडी पोलीस ठाण्याच्या हद्दीत फसवणुकीची पहिली घटना उघडकीस आली. सायबर चोरट्यांनी एका तरुणीच्या मोबाईल क्रमांकावर संदेश पाठवून तिला घरबसल्या ‘ऑनलाइन टास्क’ पूर्ण करून त्वरित पैसे कमवण्याची संधी देऊ केली. चोरट्यांनी सुरुवातीला काही किरकोळ रक्कम परत देऊन तरुणीचा विश्वास संपादन केला. त्यानंतर तिला मोठी रक्कम गुंतवल्यास ‘व्हीआयपी मेंबरशिप’ मिळेल आणि त्यातून अधिक परतावा मिळेल, असे आमिष दाखवले. या भूलथापांना बळी पडून तरुणीने वेळोवेळी चोरट्यांच्या बँक खात्यात १२ लाख १५ हजार रुपयांची रक्कम जमा केली. मात्र, रक्कम जमा होताच चोरट्यांनी परतावा देणे बंद केले आणि संपर्क तोडला. आपली फसवणूक झाल्याचे लक्षात येताच तरुणीने तात्काळ विश्रांतवाडी पोलीस ठाण्यात गुन्हा दाखल केला आहे.
शेअर मार्केटमध्ये उच्च परताव्याच्या नावाखाली २७ लाखांचा गंडा
फसवणुकीची दुसरी आणि मोठी घटना खडकी (रेंजहिल्स) परिसरात घडली. येथील एका व्यक्तीला सायबर चोरट्यांनी संपर्क साधून शेअर बाजारामध्ये गुंतवणूक करून भरघोस परतावा मिळवून देण्याचे आमिष दाखवले. चोरट्यांनी त्यांना बनावट ट्रेडिंग प्लॅटफॉर्म आणि नफ्याचे खोटे स्क्रीनशॉट्स दाखवून गुंतवणूक करण्यास प्रवृत्त केले. चांगल्या नफ्याच्या अपेक्षेने या व्यक्तीने चोरट्यांनी दिलेल्या बँक खात्यांमध्ये टप्प्याटप्प्याने मोठी रक्कम जमा केली. अशा प्रकारे फिर्यादीची २७ लाख ४१ हजार रुपयांची रक्कम हडप करण्यात आली. गुंतवणूक करूनही अपेक्षित परतावा मिळत नाहीये, हे लक्षात येताच त्यांनी खडकी पोलीस ठाण्यात सायबर फसवणुकीची तक्रार नोंदवली आहे.
एकाच दिवशी दोन वेगवेगळ्या प्रकारे झालेल्या या मोठ्या फसवणुकीमुळे पुणे पोलिसांचा सायबर विभाग अलर्ट झाला आहे. विश्रांतवाडी आणि खडकी पोलिसांनी दोन्ही प्रकरणांत गुन्हा दाखल केला असून, आरोपींचा आणि त्यांच्या बँक खात्यांचा शोध घेण्यासाठी तपास सुरू करण्यात आला आहे.
पुणे पोलिसांनी नागरिकांना सावध राहण्याचा इशारा दिला आहे. ‘झटपट पैसे कमवा’ किंवा ‘उच्च परतावा मिळेल’ अशा कोणत्याही अनोळखी संदेशांवर विश्वास ठेवू नका. तसेच, अज्ञात व्यक्तीला आपली बँक खात्याची माहिती, डेबिट कार्डाचे तपशील किंवा ओटीपी (OTP) देणे पूर्णपणे टाळावे. फसवणूक झाल्यास त्वरित सायबर पोलीस ठाण्यात तक्रार नोंदवावी असे सायबर पोलीसांकडून जनतेला आवाहन करण्यात आले आहे.
