Pune Crime: पुणे : पुण्यातील (Pune) हिंजवडी परिसरातून एका आयटी इंजिनिअरची मोठी फसवणूक झाल्याची घटना समोर आली आहे. घरगुती सामान झारखंड येथे पाठवण्याच्या बहाण्याने सुमारे २३ लाख ८० हजार रुपयांची फसवणूक झाल्याचा प्रकार उघडकीस आला आहे. या प्रकरणी हिंजवडी पोलीस ठाण्यात गुन्हा दाखल करण्यात आला असून पोलिसांकडून पुढील तपास सुरू आहे. Pune Crime
मूळचे झारखंड राज्यातील असलेले अभिषेककुमार सीताराम पाठक वय ३० हे सध्या हिंजवडी परिसरात वास्तव्यास आहेत. ते आयटी क्षेत्रात काम करत असून काही काळासाठी आपल्या गावी जाण्याचा विचार करत होते. त्यामुळे त्यांनी आपले मौल्यवान घरगुती साहित्य झारखंड येथे पाठवण्यासाठी एका ट्रान्सपोर्ट कंपनीशी संपर्क साधला. ‘EIE MARKET PLACE TECHNOLOGIES’ या कंपनीमार्फत सामान सुरक्षितपणे पोहोचवले जाईल, असे आश्वासन त्यांना देण्यात आले होते.
कंपनीचे ऑपरेशन हेड मोहनकुमार आणि एमडी सोना त्रिवेदी यांनी फिर्यादीकडून सामान वाहतुकीसाठी १ लाख २८ हजार रुपये अॅडव्हान्स घेतले. ही घटना १५ आणि १६ नोव्हेंबरदरम्यान घडली. पैसे घेतल्यानंतर काही दिवसांनी सामान झारखंडला पोहोचेल, असे सांगण्यात आले. मात्र, अनेक दिवस उलटूनही सामान पोहोचले नाही.
पाठक यांनी वारंवार संपर्क साधण्याचा प्रयत्न केला, पण कंपनीकडून कोणताही स्पष्ट प्रतिसाद मिळाला नाही. त्यानंतर त्यांनी स्वतः चौकशी केली असता आपले सुमारे २३ लाख ८० हजार रुपये किमतीचे घरगुती साहित्य परस्पर लंपास करण्यात आल्याचे समोर आले. फसवणूक झाल्याची खात्री झाल्यानंतर त्यांनी हिंजवडी पोलीस ठाण्यात तक्रार दिली.
पोलिसांनी या तक्रारीची दखल घेत मोहनकुमार आणि सोना त्रिवेदी यांच्या विरोधात भारतीय न्याय संहितेच्या BNS कलम ३१६(३), ३१६(५) आणि ३(५) अंतर्गत फसवणुकीचा गुन्हा दाखल केला आहे. सध्या आरोपींचा शोध सुरू असून, या प्रकरणात आणखी कोणी सहभागी आहे का, याचा तपास पोलीस करत आहेत.
