पुणे : मित्राच्या वाढदिवसाला न बोलावल्याच्या कारणावरून एकाने मित्रावर कोयत्याने सपासप वार करून, चार वाहनांची तोडफोड केल्याची घटना घडली आहे. गुरुवारी (ता. 20) मध्यरात्री साडेबारा वाजताच्या सुमारास ममता नगर, जुनी सांगवी येथे ही घटना घडली आहे. याप्रकरणी सांगवी पोलीस ठाण्यात एका तरुणावर गुन्हा दाखल करण्यात आला आहे.
अनिकेत गायकवाड (वय 23, रा. औंध, पुणे) असे गुन्हा दाखल झालेल्या तरुणाचे नाव आहे. याप्रकरणी मयूर सुरेश गायकवाड (वय 30, रा. ममतानगर, जुनी सांगवी) यांनी सांगवी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, मयूर गायकवाड व त्यांचे मित्र अतुल पोंगडे यांच्या जनावरांच्या गोठ्याजवळ मित्र ओम मोरे यांच्या वाढदिवसाचा केक कापत होते. त्यावेळी आरोपी अनिकेत तिथे आला. त्याने मित्रांना शिवीगाळ करत ‘मला पार्टीला का बोलावले नाही’ असे म्हणत मित्राची दुचाकी फोडण्याचा प्रयत्न केला.
मयूर गायकवाड यांनी त्याला अडवले. त्यानंतर अनिकेत याने गायकवाड यांना शिवीगाळ करून मारहाण केली. तसेच त्याच्याकडे असलेला कोयता हवेत फिरवून फिर्यादीवर वार केले. त्यानंतर आरोपी अनिकेत याने सुमित सोनवणे याची दुचाकी फोडली. दरम्यान, ममतानगर, गल्ली क्रमांक चार येथून जात असताना त्याने आणखी दोन चार चाकी आणि एक दुचाकी वाहनाची तोडफोड केली. तपास सांगवी पोलीस करीत आहेत.
