Loni Kalbhor News : लोणी काळभोर, (पुणे) : पुणे – सोलापूर महामार्गावर रील्स बनवणाऱ्या दुचाकीवरील तिघांनी शिवशाहीच्या एस. टी. बस चालकाला कट मारल्याच्या कारणावरून शिवीगाळ करून मारहाण केली. तसेच त्यांचा मोबाईल लंपास केल्याची घटना घडली आहे. गुरुवारी (ता. १२) दुपारी दीड वाजण्याच्या सुमारास कदमवाकवस्ती (ता. हवेली) ग्रामपंचायत हद्दीतील युनियन बँकेच्या समोर हि घटना घडली आहे.
बसचालकास शिवीगाळ करून मारहाण
एस. जी. कदम असे शिवशाहीच्या बस चालकाचे नाव आहे. कदम यांना मारहाण करून सहा जणांनी कदम यांचा मोबाईल पळवून नेला आहे.
चालकाने दिलेल्या माहितीनुसार, सोलापूर डेपोची शिवशाही बस हि पुण्यावरून सोलापूरच्या दिशेने निघाली होती. यावेळी हडपसरपासून दोन दुचाकीवर सहा तरुण मोबाईलवर रील्स काढत होते. हे मोटारसायकल चालक हे हडपसरपासून शिवशाही च्या पाठीमागे पुढे जाण्याचा प्रयत्न करीत होते.
कदमवाकवस्ती ग्रामपंचायत हद्दीतील युनियन बँकेजवळ आले असता शिवशाही व दुचाकी यांच्यात अपघात झाला. या अपघातात एका दुचाकीवरील तिघेजण हे रस्ता दुभाजकावर पडले. यावेळी कदम यांनी एस.टी. बस हि जागेवर थांबवली. यावेळी दुचाकीवरील तिघांनी बस चालक कदम यांना मारहाण करून त्यांच्याजवळ असलेला मोबाईल फोन पळवून नेला.
दरम्यान, या घटनेमुळे सोलापूर व पुण्याकडे जाणाऱ्या महामार्गावर मोठ्या प्रमाणात वाहतूक कोंडी झाली होती. तसेच बघ्यांनी मोठ्या प्रमाणात गर्दी केली होती. घटनास्थळी लोणी काळभोर पोलीस ठाण्यातील पोलीस अंमलदार अजिंक्य जोजारे, केतन धेंडे, अक्षय कटके, व त्यांचे सहकारी पोहचले असून वाहतूक कोंडी सोडविण्यासाठी प्रयत्न करीत होते. पुढील कार्यवाही लोणी काळभोर पोलीस करीत आहेत.
