पुणे: संभाजीनगरच्या एका मिसिंग प्रकरणाच्या चौकशीदरम्यान तिघा मुलींना विनाकारण डांबून ठेवले गेले आणि जातीय शिवीगाळ तसेच मारहाण झाली, असा गंभीर आरोप संबंधित मुलींनी केला आहे. या प्रकरणी कोथरूड पोलिस ठाण्यात अ‍ॅट्रॉसिटी कायद्यानुसार गुन्हा दाखल करावा, यासाठी या तरुणींनी पुणे पोलिस आयुक्तालयात रात्री उशिरापर्यंत ठिय्या आंदोलन केले.
पोलिसांनी आरोप फेटाळले; आता वैद्यकीय अहवाल समोर
या प्रकरणात पोलिसांनी तपास सुरू असून, तक्रारीतील आरोपात तथ्य नसल्याचे प्राथमिक निरीक्षण नोंदवले होते. दरम्यान, आता या प्रकरणात मोठी अपडेट समोर आली आहे. ससून रुग्णालयाच्या वैद्यकीय अहवालानुसार, मुलींना कोणतीही लक्षणीय शारीरिक इजा झालेली नाही, हे स्पष्ट झाले आहे.
आरोप गंभीर; परंतु पुरावा शून्य?
आरोप करणाऱ्या मुलींनी स्वतः ससून रुग्णालयात जाऊन वैद्यकीय तपासणी केली होती. मात्र वैद्यकीय अहवालात कुठलीही छोटी अथवा मोठी गंभीर इजा आढळून आलेली नाही. यामुळे त्यांच्या मारहाणीच्या आरोपाला खोटं ठरण्याची शक्यता निर्माण झाली असून, पोलिसांना दिलासा मिळू शकतो, अशी शक्यता वर्तवली जात आहे.
पोलिसांविरोधात नेमके आरोप काय?
-या तरुणींनी कोथरूड पोलीस ठाण्यातील वरच्या खोलीत तब्बल 4 तास छळ करण्यात आल्याचा आरोप केला आहे. तक्रारीनुसार:
-पोलिसांनी जातिवाचक शिवीगाळ आणि लैंगिक शेरेबाजी केली.
-गालावर, पाठीवर चापट्या, तसेच कमरेवर आणि पायावर लाथा मारल्या.
-मुलींनी हे सर्व आरोप लिहित तक्रारीत नमूद केले आहेत.
-काही पोलिस त्यांच्यावर धावून आले, असाही दावा करण्यात आला आहे.
पुढील तपास महत्त्वाचा
पोलिसांकडून या प्रकरणाचा तपास सुरू असून, वैद्यकीय अहवाल, सीसीटीव्ही फुटेज आणि साक्षीदारांचे जबाब यांवर पुढील कारवाई अवलंबून असेल. अ‍ॅट्रॉसिटी कायद्यानुसार गुन्हा दाखल होतो की नाही, हे अद्याप स्पष्ट झालेले नाही.
