Hadapsar News : हडपसर, (पुणे) : हडपसरवरून मांजरीकडे दुचाकीवरून निघालेल्या दोघा भावांच्या दुचाकीला डंपरने दिलेल्या धडकेत मागे बसलेला लहान भाऊ खाली पडून त्याच्या अंगावरून डंपरचे चाक जाऊन त्याचा जागीच मृत्यू झाल्याची घटना घडली आहे. गुरुवारी (ता. ०५) सायंकाळी सहा वाजण्याच्या सुमारास रेल्वे उड्डाणपुलावर हि घटना घडली आहे.
गुन्हा दाखल
रियाज अजिज खान (वय १४ रा. वैशाली हॉटेल मागे, हडपसर) असे अपघातात मृत्यू झालेल्या मुलाचे नाव आहे. दुचाकी चालक मोठा भाऊ सुदैवाने बचावला आहे.
पोलिसांनी दिलेल्या माहितीनुसार रियाज हा आपला मोठा भाऊ इजाज (वय – २१) याच्या दुचाकीवर मागे बसून दोघे मांजरीकडे चालले होते. रेल्वे उड्डाणपूलावरून जात असताना त्यांच्या दुचाकीला डंपरने धडक दिली. पाठीमागे बसलेला रियाज हा त्यामुळे खाली पडला. त्याच्या अंगावरून डंपरचे चाक गेल्याने तो जागीच ठार झाला.
दरम्यान, दुचाकी चालवणारा त्याचा मोठा भाऊ इजाज दुसऱ्या बाजूला पडल्याने सुदैवाने तो वाचला. डंपरच्या चाकाखाली मुलगा आल्याचे समजताच डंपर चालक डंपर तिथेच सोडून पळून गेला. हडपसर पोलीस ठाण्यात याप्रकरणी गुन्हा दाखल करण्यात आला आहे.
