राहुलकुमार अवचट
Daund News : यवत : दौंड तालुक्यातील राहू परिसरात चोरट्यांनी एका रात्रीत ३ ठिकाणी चोरी केली असून, एकूण २ लाख १८ हजारांचा ऐवज पळविला.
यवत पोलीसठाण्यात तक्रार दाखल
याबाबत मिळालेल्या अधिक माहितीनुसार, रविवारी (ता. २२) रोजी रात्रीच्या सुमारास राहू गावाच्या हद्दीतील सुरेश हंबीर यांच्या बंद घराचे कुलूप तोडून ३ तोळे वजनाचे २ गंठण, २ ग्रॅम वजनाचे २ बदाम व २ नथी, ६ ग्रॅम वजनाच्या २ अंगठ्या असे एकूण १ लाख ६० हजार रुपये किंमतीचे सोन्याचे दागिने व ५० हजारांची रोख रक्कम चोरट्यांनी लांबवली तर अविनाश गाढवे व बाळासाहेब कुंभार यांच्या घरात प्रवेश करून अनुक्रमे ४ हजार ५०० रुपये व ३ हजार रुपये किंमतीचे फोन तर कुंभार यांच्या घरातून ३ हजार रुपये रोख रक्कम असा एकूण २ लाख १८ हजार रुपयांचा मुद्देमाल चोरट्यांनी पळून नेला.
याबाबत सुरेश हंबीर यांनी यवत पोलीस स्टेशन येथे फिर्याद दिली असून, यावरून गुन्हा दाखल करण्यात आला आहे. याबाबत पुढील तपास (Daund News) यवत पोलीस स्टेशनचे पोलीस निरीक्षक हेमंत शेडगे यांच्या मार्गदर्शनाखाली पोलीस हवालदार दौंडकर करीत आहेत.
