Baramati Crime | बारामती, (पुणे) : रंगपंचमीच्या दिवशी झालेल्या किरकोळ वादातून ६ जणांनी तिघांवर कोयता, चॉपरने जीवघेणा हल्ला केल्याची घटना घडली आहे. याप्रकरणी बारामती शहर (Baramati Crime) पोलिस ठाण्यात ६ जणांच्या विरोधात गुन्हा दाखल करण्यात आला आहे.
आदित्य उर्फ आदेश मोहिते, यश मोहिते, साहिल लोंढे (पूर्ण नावे नाहीत, रा. आमराई, बारामती) यासह अन्य तीन अनोळखी अशा सहा जणांवर प्राणघातक हल्ल्याचा गुन्हा दाखल केला आहे. याप्रकरणी ओंकार अशोक जाधव (वय २२, रा. हरीकृपानगर, बारामती) याने बारामती शहर पोलीस ठाण्यात फिर्याद दिली आहे.
रंग लावण्यावरून वाद…
पोलिसांनी दिलेल्या माहितीनुसार, रंगपंचमीच्या दिवशी फिर्यादी हा त्याचे मित्र ऋतिक कांबळे, सौरभ गायकवाड यांच्यासह रंग खेळून मिशन हायस्कूलच्या ग्राऊंडवर बसले होते. यावेळी सहाजण आले त्यांच्यात व फिर्यादी यांच्यात रंग लावण्यावरून वाद झाला. तो वाद आपसात मिटून ती मुले तेथून निघून गेली.
दरम्यान वसंतनगर येथील सार्वजनिक स्वच्छतागृहाशेजारी फिर्यादी आला असताना ही मुले हातामध्ये कोयता आणि चॉपर घेऊन तेथे आली. त्यांना पाहून फिर्यादी मिशन हायस्कूलच्या ग्राऊंडवर पळत गेला. दोन, तीन अज्ञात तरुणांकडे दगड आणि सिमेंटचे ब्लॉक होते. साहिल लोंढे याने फिर्यादीला गाठत “तुला खूप मस्ती आली आहे. आज तुझा गेमच करतो”, असं म्हणाला तिघांनी कोयता आणि चॉपरने फिर्यादीच्या पाठीवर आणि उजव्या हातावर वार केले.
ऋतिक कांबळे यालाही साहिल याने “तुझा मर्डरच करून टाकतो. तू उद्याचा दिवस बघणार नाही”, असं म्हणत त्याच्याकडील चॉपरने डोक्यात वार केला. सौरभ गायकवाड मध्ये आला असता त्याच्याही मांडीवर देखील आरोपींनी कोयत्याने वार केला.
दरम्यान, अनोळखी तिघांनी दगड व सिमेंट ब्लॉकने बेदम मारहाण केली. आजूबाजूचे लोक भांडणे सोडविण्यासाठी आले असताना त्यांना धमकावत आरोपी सहाजण घटना स्थळावरुन निघून गेले. त्यानंतर स्थानिकांनी उपचारासाठी जखमींना सरकारी रुग्णालयात दाखल केले. तपास बारामती पोलीस करीत आहेत.
अधिक बातम्या वाचण्यासाठी येथे क्लिक करा…
Sassoon Hospital | आरोग्य व्यवस्थेवर ताण ; ससून हॉस्पिटलचे डीन स्वतःच करतायत शस्त्रक्रिया
