Ashok Kharat : नाशिकमध्ये अटक झालेल्या कॅप्टन अशोक खरात यांच्या प्रकरणाने केवळ एक गुन्हा नव्हे, तर ‘गुरु’ संस्कृतीभोवती तयार झालेल्या प्रभावाच्या जाळ्याचा उलगडा केला आहे. गल्लीपासून दिल्लीपर्यंत अनेक राजकीय नेते, उद्योगपती आणि सेलिब्रिटींचे हात पाहून भविष्य सांगणारे खरात आज स्वतःच कायद्याच्या कचाट्यात सापडले आहेत.
अशोक खरात स्वतःला मर्चंट नेव्हीचे निवृत्त अधिकारी असल्याचं सांगत होते. जवळपास 22 वर्षांच्या सेवेत त्यांनी अनेक देशांचा प्रवास केल्याचा दावा त्यांनी केला होता. निवृत्तीनंतर त्यांनी अचानक अध्यात्म, ब्रह्मांडशास्त्र आणि ज्योतिष या क्षेत्रात प्रवेश केला. ‘कॉस्मॉलॉजी एक्स्पर्ट’ आणि अंकशास्त्रज्ञ म्हणून त्यांनी स्वतःची ओळख तयार केली. त्यासोबतच ज्योतिष क्षेत्रात सुवर्णपदक मिळवल्याचाही दावा त्यांनी वारंवार केला.
या प्रतिमेच्या जोरावर त्यांनी सिन्नर तालुक्यात ‘शिवनिका ट्रस्ट’ आणि ईशानेश्वर मंदिराच्या माध्यमातून स्वतःचा प्रभाव वाढवला. येथे अनेक प्रभावशाली व्यक्तींची वर्दळ होती. राजकीय नेते, सेलिब्रिटी आणि उद्योगपती यांच्यासोबतचे त्यांचे फोटो आणि व्हिडीओ सोशल मीडियावर व्हायरल झाल्यानंतर त्यांच्या ‘पोहोच’बाबत चर्चा रंगली होती. मात्र, याच प्रभावाच्या आड काय सुरू होतं, यावर आता प्रश्नचिन्ह उभं राहिलं आहे.
एका 35 वर्षीय महिलेने केलेल्या तक्रारीनुसार, नोव्हेंबर 2022 ते डिसेंबर 2025 या कालावधीत खरात यांनी धार्मिक विधी, मंत्र-तंत्र आणि भविष्य सांगण्याच्या नावाखाली तिचा विश्वास संपादन केला. त्यानंतर त्याच विश्वासाचा गैरफायदा घेत लैंगिक अत्याचार केल्याचा आरोप आहे. या तक्रारीनंतर पोलिसांनी बलात्कार आणि जादूटोणा विरोधी कायद्यांतर्गत कारवाई करत खरात यांना अटक केली.
