Ahilyanagar : मिरी गावात एक भीषण अपघात झाल्यामुळे संपूर्ण गावावर शोककळा पसरली आहे. दारू पिऊन बेफामपणे ट्रक चालवणाऱ्या चालकाच्या निष्काळजीपणामुळे दोन तरुणांचा जागीच मृत्यू झाला. (Ahilyanagar)
मंगळवारी रात्री सुमारे 8 वाजता पांढरीपूल-शेवगाव रस्त्यावरील एकनाथनगर परिसरात उसाने भरलेल्या ट्रकने रस्त्याच्या कडेला उभी असलेली मोटारसायकल जोरात धडकली. या अपघातात गणेश वाघ (वय 39) आणि तेजस जगताप (वय 19), दोघेही मिरी गावचे, यांचा जागीच मृत्यू झाला.
धक्का दिल्यानंतरही ट्रक चालक थांबला नाही. दुचाकी ट्रकखाली अडकलेली असतानाच तो ट्रक घेऊन पळत सुटला. शिंगवे परिसरात पोहोचल्यावर दुचाकी रस्त्यावर घसरून पडली. पुढे जाताना ट्रकने रस्त्यावरच्या लोकांनाही धोक्यात टाकलं. काही लोक थोडक्यात बचावले. पांगरमल ते खोसपुरी दरम्यान ट्रकने एका ट्रॅक्टर ट्रॉलीला धडक दिली, त्यात मोठं नुकसान झालं. शेवटी ट्रक चालकाचं नियंत्रण सुटलं आणि ट्रक रस्त्याच्या बाजूच्या शेतात घुसून थांबला. या अपघातात ट्रक चालकाला किरकोळ दुखापत झाली आहे.
घटनेची माहिती मिळताच मिरी आणि आसपासच्या गावांतील लोक मोठ्या संख्येने रस्त्यावर उतरले. संतप्त नागरिकांनी ट्रक चालकाचा पाठलाग करून त्याला पकडण्याचा प्रयत्न केला. दारू पिऊन गाडी चालवणाऱ्या या चालकावर कडक कारवाई करावी, अशी जोरदार मागणी ग्रामस्थ करत आहेत.
मृत गणेश वाघ हे इलेक्ट्रिक लाइट फिटिंगचं काम करत होते. त्यांच्या मागे आई-वडील, पत्नी, दोन लहान मुलं आणि तीन विवाहित बहिणी आहेत. तेजस जगताप हा बांधकाम साहित्याच्या दुकानात काम करत होता. त्याच्या मागे आई-वडील, एक लहान भाऊ आणि एक लहान बहीण आहेत. घरातील कर्त्या मुलांच्या जाण्याने दोन्ही कुटुंबांवर दुःखाचा डोंगर कोसळला आहे.
हा ट्रक वांबोरी येथील ‘प्रसाद शुगर’ या खासगी साखर कारखान्यासाठी ऊस वाहतूक करत होता. ट्रक चालक आणि मालक हे बीड जिल्ह्यातील गेवराई तालुक्यातील असल्याची माहिती आहे.
या घटनेच्या निषेधार्थ शुक्रवारी (19 डिसेंबर) रास्ता रोको आंदोलन करण्यात येणार आहे. त्यामुळे परिसरात तणावाचं वातावरण निर्माण झालं आहे. दारू पिऊन वाहन चालवणाऱ्यांवर कडक कारवाई कधी होणार? अजून किती निष्पाप बळी जाणार? असा संतप्त सवाल नागरिकांकडून उपस्थित केला जात आहे.
