पुणे : पायी चाललेल्या तरूणाला अडवून त्याच्यावर चाकूने वार करत २५ हजार रूपये चोरून नेल्याची घटना हडपसरमधील काळेपडळ परिसरात घडली आहे. ही घटना मंगळवारी (ता. २०) रोजी घडली आहे.
याप्रकरणी किरण शिंदे (वय ३१ रा. ससाणेनगर, हडपसर ) यांनी हडपसर पोलीस ठाण्यात फिर्याद दिली आहे. त्यानुसार तीन अज्ञात व्यक्तींवर गुन्हा दाखल करण्यात आला आहे.
पोलिसांनी दिलेल्या माहितीनुसार, किरण हा मंगळवारी (ता. २०) रोजी २५ हजार रूपये घेउन रस्त्याने पायी चालत जात होता. हडपसरमधील काळेपडळ परिसरात आल्यावर त्याच्या जवळ तीन चोरटे आले. त्या चोरट्यांनी किरणला शिवीगाळ केली. त्यानंतर त्यांच्या जवळील २५ हजारांची रोकड हिसकावून घेत त्याच्यावर चाकूने वार केले.
किरण हा गंभीर जखमी झाला त्यानंतर चोरट्यांनी त्या ठिकाणाहून पळ काढला. याप्रकणी किरण याने हडपसर पोलीस ठाण्यात फिर्याद दिली. या घटनेचा पुढील तपास पोलीस करीत आहेत.
