Air Taxi in India : मुंबई : देशाच्या प्रमुख शहरांमध्ये वर्दळ एवढी वाढली आहे की, लवकरच हवेतून टॅक्सी चालविण्याचे स्वप्न वास्तवात येणार आहे. या एअर टॅक्सीचा प्रयोग लवकरच भारतात होणार आहे. त्यामुळे भारतीयांची ट्रॅफीक जामच्या कटकटीतून कायमची सुटका होणार आहे. सुरूवातीला एअर टॅक्सीच्या प्रवासाचा खर्च खूप असेल, मात्र नंतर तो स्वस्त होईल, असे सांगण्यात येत आहे.
इंडिगोची पॅरेंट कंपनी इंटरग्लोब एंटरप्राईझेसने अमेरिकेतील इलेक्ट्रीक व्हर्टीकल टेकऑफ एण्ड लॅंडींग ( ईव्हीटीओएल ) आर्चर एव्हीएशन सोबत सामंजस्य करार केला आहे. दोन्ही कंपन्यांनी साल 2026 पर्यंत इलेक्ट्रीक टॅक्सी सर्व्हीसची सुरुवात करण्याची जोरदार तयारी केली आहे. दुबई येथे अलिकडेच एअर टॅक्सीचा प्रयोग यशस्वी झाला होता. इंटरग्लोब एंटरप्राईझेसची योजना या सेवेला अमेरिकन कंपनी आर्चर एव्हीएशनच्या मदतीने सुरु करण्याची आहे. इंटरग्लोब-आर्चर कंपनीचे टार्गेट प्रवाशांना राष्ट्रीय राजधानी दिल्लीतील कनॉट प्लेसपासून हरियाणाच्या गुरुग्राम येथे सात मिनिटांत एअर टॅक्सीने पोहचविण्याचे आहे. रस्ते मार्गाने 27 किमीच्या या प्रवासाला एक ते दीड तासांचा वेळ लागतो.
दिल्ली, मुंबईत सेवा सुरू करणार
शहरी हवाई टॅक्सी सेवेशिवाय विमानांसाठी कार्गो, लॉजिस्टीक्स, वैद्यकीय आणि इमर्जन्सी सेवे सोबत चार्टर सेवेसह अन्य अनेक सेवा देण्याची तयारी करीत आहेत. एअर टॅक्सीची सेवा आधी राजधानी दिल्लीतून होणार असली तर आर्थिक राजधानी मुंबईतून देखील ही सेवा सुरु करण्याची योजना आहे. सुरुवातीला ही सुविधा थोडी महाग असू शकते. हेलिकॉप्टरच्या धर्तीवर ही सेवा सुरु होऊ शकते. भविष्यातील एअर टॅक्सीचे जाळे निर्माण होऊ शकते. त्यासाठी एअर ट्रॅफीक कंट्रोलर तसेच रडार यंत्रणा यांचे काम वाढणार आहे.
