सोलापूर : सांगोला तालुक्यात किरकोळ कारणावरून पोटच्या मुलानेच आई-वडिलांची हत्या केल्याची धक्कादायक घटना समोर आली आहे. पाचेगाव बुद्रुक येथील दाम्पत्याच्या दुहेरी खून प्रकरणाचा पोलिसांनी अखेर उलगडा केला आहे. रेशन कार्ड न दिल्याच्या कारणावरून कौटुंबिक वादातून पोटच्या मुलानेच आई- वडिलांचा गळा दाबून खून केल्याचे तपासात समोर आले आहे. ही घटना २९ फेब्रुवारी रोजी सायंकाळी ७ वाजण्याच्या सुमारास घडली. याप्रकरणी पोलिसांनी मुलगा समाधान भीमराव कुंभार याच्याविरुद्ध खुनाचा गुन्हा दाखल करून रविवारी रात्री उशिरा अटक केली आहे.
याबाबत पोलिसांनी दिलेल्या माहितीनुसार, समाधानला आपल्या मुलीचा जातीचा दाखला काढण्यासाठी रेशन कार्डची गरज होती. तो आई-वडिलांकडे मागील ८ ते १० दिवसांपासून रेशन कार्ड मागत होता. मात्र ते त्याला देत नव्हते. याचाच राग त्याचा मनात होता. दरम्यान, समाधान वडिलांच्या घरी जाऊन चहा करत असणाऱ्या आई सुशीलाकडे रेशन कार्ड मागितले. तिने सापडत नसल्याचे सांगताच तो पेटीत शोध घेऊ लागला. त्यावेळी आई त्याला विरोध करू लागल्याने त्याने आईला रागाच्या भरात गच्चीवर नेऊन गळा दाबून पुन्हा जिन्यावरून खाली ओढत आणून नायलॉनच्या दोरीने गळा आवळला.
खिडकीला बांधून पाय ओढल्याने आईचा मृत्यू झाला. हा प्रकार सुरू असताना वडील भीमराव त्याला विरोध करताना त्यांचाही गळा दाबून लोखंडी कुटी गळ्यात आरपार घुसवून ठार मारले. ठार झाल्याची खात्री करून बाथरूममध्ये हातपाय धुऊन मिरवणुकीत सामील झाल्याची कबुली त्याने पोलिसांना दिली.
