पुणे : कर्जत-जामखेडमधील एमआयडीच्या मुद्द्यावरून राष्ट्रवादी काँग्रेसचे आमदार रोहित पवार आणि भाजपाचे आमदार राम शिंदे हे समोरा-समोर आले आहेत. याबाबत उपमुख्यमंत्री अजित पवार यांना प्रसारमाध्यमांनी विचारले असता, त्यांनी ‘मग मी काय करू’ असं उत्तर दिलं आहे. तसेच, ‘राम शिंदे सांगतील, त्या पद्धतीनं कर्जत एमआयडीसीचा प्रश्न सुटेल,’ असं अजित पवारांनी म्हटलं आहे. यावर आता आमदार रोहित पवारांनी प्रतिक्रिया दिली आहे. ते पुण्यात प्रसारमाध्यमांशी बोलत होते.
आमदार रोहित पवार म्हणाले, “आमदार राम शिंदे सांगतील, तसं व्हावं. पण, हजार एकरापेक्षा कमी परिसरात एमआयडीसी नको. कर्जत तालुक्यामध्ये बऱ्याच ठिकाणी माळढोक पक्षाचा आणि जंगलाचा प्रश्न आहे. आम्ही निवडलेल्या जागी मोठ्या कंपन्या येऊ शकतात. मात्र, ही जागा बदलली, तर तिथे फक्त गोडाऊनच होऊ शकतात. त्यामुळे जास्त लोकांना नोकरी मिळू शकणार नाही.”
तसेच “आम्ही अभ्यास करून घेतलेला निर्णय योग्यच आहे. त्याबाबत अजित पवार लक्ष घालतील. पण, निर्णय चुकला, तर आम्ही शांत बसणार नाही,” अशा इशारा आमदार रोहित पवारांनी दिला आहे.
उपमुख्यमंत्री अजित पवार नेमकं काय म्हणाले?
“राम शिंदे सांगतील, त्या पद्धतीनं कर्जत एमआयडीची प्रश्न सुटेल. नियमाच्या चौकटीत बसून तो मुद्दा सोडवावा लागेल. तिथं तरूण-तरूणींना रोजगार कसा मिळेल, याचा विचार केला पाहिजे. त्याठिकाणी गुंतवणूक कशी होईल, यासाठी महायुतीचा प्रयत्न चालला आहे,” असं अजित पवारांनी सांगितलं.
