सोलापूर: सोलापूरमध्ये हैदराबाद–सोलापूर महामार्गावर (Solapur-Hydrabad Highway) झालेल्या भीषण अपघातात दोन तरुणांचा जागीच मृत्यू झाल्याने परिसरात (Accident News) हळहळ व्यक्त होत आहे. बोरामणी नाका येथे भरधाव ट्रकने दुचाकीला दिलेल्या जोरदार धडकेत ही दुर्घटना घडली. (Latest Marathi News)
मिळालेल्या माहितीनुसार, ट्रकने दुचाकीला धडक दिल्यानंतर दोघेही खाली पडले आणि त्यानंतर ट्रकच्या चाकाखाली येऊन त्यांचा मृत्यू झाला. सैफन शेख आणि फरीद पटेल अशी मृतांची नावे असून, दोघेही दक्षिण सोलापूर तालुक्यातील बोरामणी गावचे रहिवासी होते. ते व्यवसायाने आचारी होते आणि कामाच्या निमित्ताने सोलापूरला आले होते.
या अपघाताची तीव्रता इतकी होती की घटनास्थळीच दोघांचा मृत्यू झाला. काही क्षणांत घडलेल्या या दुर्घटनेने उपस्थितांना धक्का बसला. अपघातानंतर काही काळ महामार्गावरील वाहतूकही ठप्प झाली होती.
विशेष म्हणजे, हा संपूर्ण अपघात सीसीटीव्ही कॅमेऱ्यात कैद झाला आहे. फुटेजमध्ये ट्रकचा वेग आणि धडकेची तीव्रता स्पष्टपणे दिसत असल्याने अपघाताची भीषणता अधिक अधोरेखित होते. पोलिसांनी हे फुटेज ताब्यात घेतले असून पुढील तपासासाठी त्याचा उपयोग केला जाणार आहे.
दरम्यान, पोलिसांनी घटनास्थळी पंचनामा करून तपास सुरू केला असून ट्रकचालकाची जबाबदारी निश्चित करण्यावर भर दिला जात आहे. दोन्ही मृतांच्या कुटुंबांवर दुःखाचा डोंगर कोसळला असून गावात शोककळा पसरली आहे.
